Минея, 18 Августа.
Глас 1
Песнь 1
Ирмос: Отверзу уста моя,/ и наполнятся духа,/ и слово отрыгну Царице Матери,/ и явлюся, светло торжествуя,/ и воспою, радуяся, Тоя чудеса.
Припев: Пресвята́я Богоро́дице, спаси́ на́с.
О, Преблагая Заступнице наша! Недоумеем песнословити Тя по достоянию, обаче любовию понуждаеми, молим Тя: сподоби принести Тебе песни благодарственныя.
Припев: Пресвята́я Богоро́дице, спаси́ на́с.
Приидите, вернии, ко всечестному образу Богородицы Всецарицы припадем, обымем сердцем и лобызаем устны, со умилением молящеся Всемилостивой Владычице.
Сла́ва Отцу́ и Сы́ну и Свято́му Ду́ху.
От Небесных славимая и от земных ублажаемая, девственными добротами преисполненная, Пречистая Дево, приими моления наша и призри на нас благоуветливым взором Твоим.
И ны́не и при́сно и во ве́ки веко́в. Ами́нь.
Дивны чудеса Твоя, Господи, яко даровал еси миру преславную Богоотроковицу Марию, от всех родов избранную во спасение рода человеческаго.
Песнь 3
Ирмос: Твоя песнословцы, Богородице,/ живый и независтный Источниче,/ лик себе совокупльшия духовно утверди,/ в Божественней Твоей славе/ венцев славы сподоби.
Припев: Пресвята́я Богоро́дице, спаси́ на́с.
Ты еси источник златоструйный, росу утешения источаяй сердцам скорбящим, о Царице Дево. Ободри ны в час испытания, от отчаяния избави и слезы претвори в росу небесныя радости.
Припев: Пресвята́я Богоро́дице, спаси́ на́с.
Молим Тя о сродницех наших, Госпоже Всецарице, исцели недуги неисцельныя, устави раковыя язвы стужение, терпение неистощимое страждущим даруй и слезами покаяния омый сердца их.
Сла́ва Отцу́ и Сы́ну и Свято́му Ду́ху.
Любы Твоя, о Богомати, якоже огнь небесный, да затеплит в сердцах наших светлосиянныя светильники молитвы и любве.
И ны́не и при́сно и во ве́ки веко́в. Ами́нь.
О, Всесветлая Владычице, покрый нас честным Твоим омофором и светоносными лучами благодати отжени темный облак печалей наших.
Седален, глас 8
Днесь празднуем пришествие честнаго образа Твоего, Мати Божия, к немуже с верою припадаем, Всеблаженная, и молим Тя: посети сущия в болезнех и печалех, и покрый от бед и зол рабы Твоя.
Песнь 4
Ирмос: Седяй в славе/ на Престоле Божества,/ во облаце легце,/ прииде Иисус Пребожественный/ нетленною Дланию, и спасе зовущия:/ слава, Христе, силе Твоей.
Припев: Пресвята́я Богоро́дице, спаси́ на́с.
В знои неисцельных болезней страждущим одожди капли небеснаго милосердия Твоего, Пречистая, и благодати прохладою услади души изнемогающия.
Припев: Пресвята́я Богоро́дице, спаси́ на́с.
Купина Тя неопальная прообразоваше, о Царице Дево, не опали бо чрево Твое огнь Божества. Темже молим Тя: огня геенскаго избави ны.
Сла́ва Отцу́ и Сы́ну и Свято́му Ду́ху.
Радуйся, Богоизбранная Отроковице, одушевленный Храме, Чертоже Слова Божия, во святый храм во младенческих летех введенная и тамо воспитанная. Темже молим Тя: научи и ны ко храму Божию усердно прилежати.
И ны́не и при́сно и во ве́ки веко́в. Ами́нь.
Ты от святаго Ангела пищу небесную приемлющи, под сению храма Господня пребывала еси, Дево Нетленная. Темже напитай и наша во страстех изсохшия души и сподоби Христовых Таин достойно причащатися.
Песнь 5
Ирмос: Ужасошася всяческая/ о Божественней славе Твоей;/ Ты бо, Неискусобрачная Дево,/ имела еси во утробе над всеми Бога,/ и родила еси Безлетнаго Сына,/ всем воспевающим Тя/ мир подавающая.
Припев: Пресвята́я Богоро́дице, спаси́ на́с.
О, Всеблаженная Богомати, согрешающих исправление, умягчи изсохшую землю сердец наших, да, приемше семена слова Божия, достойныя плоды покаяния принесем Владыце Христу.
Припев: Пресвята́я Богоро́дице, спаси́ на́с.
Погибших Ты еси Взыскание, Приснодево Марие, и Ходатаица о нас к Сыну Твоему и Богу, Ты еси Пристанище спасительное обуреваемым в мори житейстем и погружаемым напастьми многими.
Сла́ва Отцу́ и Сы́ну и Свято́му Ду́ху.
Токами благодати, чрез святый образ Твой, Всецарице, на нас изливаемыми, омый грехов наших скверну и угаси страстей пещь, да обрящем чистоту сердечную и уневестим души Христу, Спасу нашему.
И ны́не и при́сно и во ве́ки веко́в. Ами́нь.
Радуйся, Всепетая Царице! Зарю, наставляющую к свету, возсияй душам нашим, рождшая Солнце правды Христа, Радость и Спасение миру.
Песнь 6
Ирмос: Божественное сие и всечестное/ совершающе празднество,/ богомудрии, Богоматере,/ приидите, руками восплещим,/ от Нея рождшагося Бога славим.
Припев: Пресвята́я Богоро́дице, спаси́ на́с.
Не возгнушайся нас, многогрешных, о сладкоуханный Крине чистоты! Отжени плотское мудрование, устави молву лукавых помышлений и сподоби добродетелей благоухание Творцу присно приносити.
Припев: Пресвята́я Богоро́дице, спаси́ на́с.
Помози нам, Богоневесто, нрав смирен стяжати, всегда радоватися, за вся Творца благодарити, и ко Христу, Спасителю нашему, непрестанно молитися научи ны.
Сла́ва Отцу́ и Сы́ну и Свято́му Ду́ху.
Пришествием иконы Твоея озаряеми, молим Тя, Всецарице: буди нам, грешным, Споручница, на стези спасительныя настави, побори борющия ны и победу непобедимую во бранех даруй.
И ны́не и при́сно и во ве́ки веко́в. Ами́нь.
О, чистая Голубице, Нескверная Агнице, Агнца и Пастыря неизреченно рождшая! Воистину Ты еси ангельских чинов превысшая, умоли о нас Божественнаго Сына Твоего.
Кондак, глас 8
Новоявленней иконе Богородице Всецарице предстояще/ и на лик Тоя взирающе,/ со умилением и любовию глаголем:/ низпосли, Владычице, цельбы к Тебе притекающим,/ и подаждь утешение в скорби сущим,/ да, восприемше милость, благодарне воззовем Ти:/ Радуйся, Всецарице, недуги наша благодатию исцеляющая.
Икос
Ангел предстатель с небесе послан бысть, рече Богородице: радуйся, Благодатная, Господь с Тобою! И, со боговещанным гласом воплощаема зря Господа, возопи к Ней таковая: Радуйся, главизно нашего спасения; радуйся, Исполнение Зиждителева смотрения. Радуйся, яко Тобою Бог воплотися; радуйся, яко Невидимый в Тебе изобразися. Радуйся, Милость мира внутрь приимшая; радуйся, одеяние плоти Слову соткавшая. Радуйся, уму непостижная горняя славо; радуйся, сердца оживившая небесная манно. Радуйся, Звездо, благодати сияние; радуйся, Источниче, живыя воды излияние. Радуйся, Богородице, в женах благословенная; радуйся, рождшая Спаса, Дево нетленная. Радуйся, Всецарице, недуги наша благодатию исцеляющая.
Песнь 7
Ирмос: Не послужиша твари богомудрии/ паче Создавшаго,/ но, огненное прещение мужески поправше,/ радовахуся, поюще:/ препетый отцев Господь и Бог, благословен еси.
Припев: Пресвята́я Богоро́дице, спаси́ на́с.
Сподоби ны, Преблагая Богородительнице, преславное имя Иисусово умом и сердцем призывати и сею молитвою услади горечь печалей и скорбей наших.
Припев: Пресвята́я Богоро́дице, спаси́ на́с.
Притецыте, вси здравия ищущии, ко благосердой Деве Марии Богородице и почерпите воду жизни от источника спасительнаго.
Сла́ва Отцу́ и Сы́ну и Свято́му Ду́ху.
Благословен еси, Господи Иисусе Христе, Спасителю наш, яко в час крестных страданий Твоих благоволил еси поручити ны покрову Пречистыя Матере Твоея и чадами Ея соделал еси.
И ны́не и при́сно и во ве́ки веко́в. Ами́нь.
Радуйся, одушевленная Палато Божества, едина неискусомужная Дево Марие, во утробу девственную Бога вместившая. Темже с Гавриилом Архангелом вопием Ти: благословенна Ты в женах, и благословен Плод чрева Твоего.
Песнь 8
Ирмос: Отроки благочестивыя в пещи/ рождество Богородичо спасло есть:/ тогда убо образуемое,/ ныне же действуемое,/ вселенную всю воздвизает пети Тебе:/ Господа пойте, дела,/ и превозносите Его во вся веки.
Припев: Пресвята́я Богоро́дице, спаси́ на́с.
О, Богомати Всецарице, просвети ны познанием Сына Твоего, да, наследствующе Царствие Небесное, воспоем Господа и превозносим Его во вся веки.
Припев: Пресвята́я Богоро́дице, спаси́ на́с.
Сила Божия в немощи совершается. Темже сподоби ны, Госпоже, вся посылаемая нам со благодарением терпети и за вся Сына Твоего и Бога нашего славити.
Благослови́м Отца́ и Сы́на и Свята́го Ду́ха, Го́спода.
Умири сердца наша и в тишине помыслов соблюди, Всесвятая Мати Дево, да, молящеся на всякое время, Господа благословим и превозносим во вся веки.
И ны́не и при́сно и во ве́ки веко́в. Ами́нь.
Во успении мира не оставила еси, о Богомати, но присно с нами пребываеши и предстательством Твоим нас спасаеши.
Песнь 9
Ирмос: Всяк земнородный/ да взыграется, Духом просвещаемь,/ да торжествует же безплотных умов естество,/ почитающее священное торжество Богоматере,/ и да вопиет:/ радуйся, Всеблаженная,/ Богородице чистая Приснодево.
Припев: Пресвята́я Богоро́дице, спаси́ на́с.
О, Царице Дево, раковыя язвы предивная Целительнице! Яви Свою милость в долгонедужии сущим и подаждь им здравие, да воспевают выну Тя, Всеблагая Мати Божия.
Припев: Пресвята́я Богоро́дице, спаси́ на́с.
Виждь, Владычице, неможение наше и приими смиренная моления наша, буди нам Благая Путеводительница ко спасению и настави путем тесным шествовати к жизни вечней, да Тя непрестанно величаем.
Сла́ва Отцу́ и Сы́ну и Свято́му Ду́ху.
О, Мати милосердия и утешения! Ущедри ны неизреченною Твоею благостынею и благослови ны, тепле Тя воспевающия.
И ны́не и при́сно и во ве́ки веко́в. Ами́нь.
Вси роди христианстии ублажают Тя, Богородительнице Пречистая, яко призре Господь на смирение Твое и сотвори Ти величие неисповедимое.
Светилен
Светел есть честный праздник иконы Твоея, Всецарице, егоже в торжестве духовнем благолепно совершающе, величаем Тя, светоносная Скиние Христа, Царя и Бога нашего.
Молитва
О, Пречистая Богомати, Всецарице! Услыши многоболезненное воздыхание наше пред чудотворною иконою Твоею, из удела Афонскаго в Россию пренесенною, призри на чада Твоя, неисцельными недуги страждущия и ко святому образу Твоему с верою припадающия! Якоже птица крилома покрывает птенцы своя, тако и Ты ныне покрый нас многоцелебным Твоим омофором. Тамо, идеже надежда исчезает, несумненною Надеждою буди. Тамо, идеже лютыя скорби превозмогают, Терпением и Ослабою явися. Тамо, идеже мрак отчаяния в души вселися, неизреченным светом Твоим возсияй! Малодушныя утеши, немощныя укрепи, ожесточенным сердцам умягчение и просвещение даруй. О, Всемилостивая Царице! Исцели болящия люди Твоя, устави раковыя язвы стужение и благослови врачующих нас, да послужат орудием Всемощнаго Врача, Христа Спаса нашего. О, Владычице, Радосте скорбящих и печальных Утешение! Простри руце Твои, исполненныя исцеления и врачбы, да, чудотворную помощь скоро получивше, прославим Живоначальную и Нераздельную Троицу, Отца и Сына и Святаго Духа во веки веков. Аминь.
Молитва болящаго
О, Всеблагая, досточудная Богородице Всецарице! Несмь достоин, да внидеши под кров мой! Но, яко милостиваго Бога любоблагоутробная Мати, рцы слово, да исцелится душа моя и укрепится немощствующее тело мое. Ты бо имаши державу непобедимую, о Всецарице, и не изнеможет у тебе всяк глагол. Ты за мя упроси, Ты за мя умоли Христа Бога нашего, да прославляю преславное имя Его всегда, ныне и в безконечныя веки. Аминь.