Минея, 25 Ноября.

Глас 8

Песнь 1

Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Припев: Священному́чениче Кли́менте, моли́ Бо́га о на́с.
От Петра́ Боже́ственнаго научи́вся, апо́столов верхо́внаго,/ и от него́ навы́к Боже́ственное зна́ние, о́тче,/ и́дольскую лесть обличи́л еси́.
Припев: Священному́чениче Кли́менте, моли́ Бо́га о на́с.
Ло́зу Богонасажде́ну на земли́,/ плоды́ доброде́тельныя уче́ний всеблагочести́вых Христо́с тя предлага́ет,/ и́стинно су́щий цвету́щ виногра́д.
Сла́ва Отцу́ и Сы́ну и Свято́му Ду́ху.
Во вся концы́ протече́/ вои́стинну Боже́ственных повеле́ний твое́ веща́ние, Кли́менте му́дре,/ и вся просвети́ Тро́ицу Богосло́вити во еди́нстве Божества́.
И ны́не и при́сно и во ве́ки веко́в. Ами́нь.
Богородичен: Се прорече́ния проро́ческая о Тебе́ прия́ша коне́ц вои́стинну,/ Сло́во бо без се́мене заче́нши, Богороди́тельнице,/ пло́тию родила́ еси́.

Песнь 3

Ирмос: Страх Твой, Го́споди,/ всади́ в сердца́ раб Твои́х,/ и бу́ди нам утвержде́ние,/ Тя во и́стине призыва́ющих.
Припев: Священному́чениче Кли́менте, моли́ Бо́га о на́с.
Бога́тно излия́ся Ду́ха благода́ть в твоя́ устна́, му́дре,/ е́юже вся просвети́л еси́ Боже́ственными твои́ми уче́нии/ и Христу́ приве́л еси́.
Припев: Священному́чениче Кли́менте, моли́ Бо́га о на́с.
Огне́м воздержа́ния ты попали́л еси́ страсте́й огнепа́льная стремле́ния/ и храм себе́ соверши́в/ Ду́ха Боже́ственнаго, доблему́дренне о́тче.
Сла́ва Отцу́ и Сы́ну и Свято́му Ду́ху.
На го́ру Боже́ственных доброде́телей возше́д/ и мра́ком покры́вся разу́мным,/ узре́л еси́ неизрече́нную в чи́стей души́ твое́й духо́вную зарю́.
И ны́не и при́сно и во ве́ки веко́в. Ами́нь.
Богородичен: Неизрече́нно зачала́ еси́, Пречи́стая, Спа́са и Го́спода,/ изба́вльшаго нас от лю́тых,/ Тя во и́стине призыва́ющих.

Седален, глас 4

Возсия́в, я́коже со́лнца заря́,/ и блиста́еши, преподо́бне, всему́ ми́ру све́тло уче́нии твои́ми,/ Богогла́се Кли́менте светоно́сне, му́чеников похвало́.

Песнь 4

Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Припев: Священному́чениче Кли́менте, моли́ Бо́га о на́с.
От за́пада прише́д, блаже́нне, к восто́ку,/ Петру́ примеси́лся еси́ апо́столу:/ и того́ Боже́ственными светлостьми́ и уче́нии просвеща́емь,/ с ним возвеща́я спаси́тельное Сло́во,/ за́падную всю проте́кл еси́ страну́.
Припев: Священному́чениче Кли́менте, моли́ Бо́га о на́с.
Други́й Моисе́й, Кли́менте му́дре, был еси́,/ зако́ны Боже́ственныя всем излага́я/ и свяще́нная пиша́ уче́ния, и церко́вное все вчиня́еши исполне́ние./ Отсю́ду законополо́жника тя и учи́теля вси иму́ще, ве́рою чтим.
Сла́ва Отцу́ и Сы́ну и Свято́му Ду́ху.
По́стническими по́ты очи́стився,/ священнонача́льник, блаже́нне, яви́лся еси́,/ к благочести́вей ве́ре Христо́вей вся возводя́ Боже́ственными твои́ми сказа́нии,/ пострада́в же зако́нно,/ подо́бне боле́зни сплете́ вене́ц, приснопа́мятне.
И ны́не и при́сно и во ве́ки веко́в. Ами́нь.
Богородичен: С Бо́гом Тя засту́пницу стяжа́хом,/ Ты бо Ма́ти Бо́жия была́ еси́ Творца́ и Соде́теля,/ наш о́браз прие́мша, Пренепоро́чная,/ и Того́ спа́сша от тли и сме́рти и сла́вою Боже́ственною просла́вльшаго.

Песнь 5

Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Припев: Священному́чениче Кли́менте, моли́ Бо́га о на́с.
Во све́те за́поведей ходя́ Госпо́дних,/ ча́до вои́стинну яви́лся еси́ Того́, блаже́нне, нело́жное.
Припев: Священному́чениче Кли́менте, моли́ Бо́га о на́с.
Всего́ на земли́ ты отре́клся еси́ пристра́стия, священнонача́льниче,/ да бу́дущее благосла́вие получи́ши и све́тлости сла́вы Христо́вы.
Сла́ва Отцу́ и Сы́ну и Свято́му Ду́ху.
Му́ченическими укра́шен светлостьми́,/ со А́нгелы ны́не предстои́ши Влады́це,/ о пою́щих моли́ся.
И ны́не и при́сно и во ве́ки веко́в. Ами́нь.
Богородичен: Ма́ти Бо́жия,/ ве́рою Тя пою́щия от бед изба́ви моли́твами Твои́ми, Де́во,/ я́ко Тя предста́тельницу ве́мы, Чи́стая.

Песнь 6

Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Припев: Священному́чениче Кли́менте, моли́ Бо́га о на́с.
Ре́вностию разжже́н Госпо́дни любве́, му́дре,/ и́дольскую лесть обличи́л еси́ кре́пко слове́сными противле́нии/ и чуде́сными явле́нии, всехва́льне.
Припев: Священному́чениче Кли́менте, моли́ Бо́га о на́с.
Недрема́нно соблю́л еси́ о́ко се́рдца твоего́,/ за зло́бу ника́коже воздрема́в, сла́вне,/ Боже́ственными восхожде́нии вчиня́я доброде́телей к верхо́вному.
Сла́ва Отцу́ и Сы́ну и Свято́му Ду́ху.
Я́ко иера́рх че́стен,/ вяза́ти и реши́ти прегреше́ния власть прии́м от Спа́са Христа́,/ мно́гих мои́х прегреше́ний долг разреши́, возводя́ к покая́нию.
И ны́не и при́сно и во ве́ки веко́в. Ами́нь.
Богородичен: Твои́ми мольба́ми, Чи́стая,/ бед и напа́стей исхи́ти мя лю́тых и изба́ви мя, молю́ся,/ Ты бо стена́ еси́ неразруши́ма,/ и приста́нище, и покро́в,/ и необори́мое утвержде́ние.

Кондак, глас 4

Це́ркве недви́жимии и Боже́ственнии пи́ргове,/ благоче́стия Боже́ственнии столпи́ вои́стинну кре́пцыи,/ Кли́менте с Петро́м всехва́льнии,/ ва́шими моли́твами соблюди́те вся.

Песнь 7

Ирмос: О́троцы благочести́вии в Вавило́не/ о́бразу злато́му не поклони́шася,/ но посреде́ пе́щи о́гненныя, ороша́еми,/ песнь воспе́ваху, глаго́люще:/ превозноси́мый отце́в и нас Бо́же, благослове́н еси́.
Припев: Священному́чениче Кли́менте, моли́ Бо́га о на́с.
Я́коже у́тро, возсия́л еси́,/ просвеща́я земли́ вся концы́/ и нощь преле́стную отгоня́, Богогла́се, и́дольскаго безбо́жия,/ благослове́н еси́, вопия́, Бо́же оте́ц на́ших.
Припев: Священному́чениче Кли́менте, моли́ Бо́га о на́с.
Вся спасти́ хотя́ Бог твои́ми моли́твами,/ прозре́ние дарова́ Сиси́нию,/ и души́, и телеси́ очеса́ отве́рз, о́тче,/ отту́ду просвеща́ется Боже́ственною ба́нею.
Сла́ва Отцу́ и Сы́ну и Свято́му Ду́ху.
Струи́ исцеле́ний то́чиши от Боже́ственныя твоея́ ра́ки, Кли́менте сла́вне,/ страсте́й мно́гих избавля́еши всегда́ притека́ющия к тебе́ и пою́щия:/ благослове́н Бог оте́ц на́ших.
И ны́не и при́сно и во ве́ки веко́в. Ами́нь.
Богородичен: Подоба́ше без се́мене воплоща́емому из Тебе́ проити́, Де́во пречи́стая,/ Ты бо возрасла́ еси́ всех, Чи́стая, пребо́льши./ Те́мже Ти непреста́нно зове́м:/ благослове́н Плод чре́ва Твоего́.

Песнь 8

Ирмос: Мусики́йским орга́ном согласу́ющим/ и лю́дем безчи́сленным, покланя́ющимся о́бразу в Деи́ре,/ три о́троцы, не повину́вшеся,/ Го́спода воспева́ху/ и славосло́вяху во вся ве́ки.
Припев: Священному́чениче Кли́менте, моли́ Бо́га о на́с.
Учени́к быв Петро́в,/ Боже́ственныя нра́вы того́ подража́я, Кли́менте страда́льче,/ те́мже и престо́ла прее́мник и́стинно показа́лся еси́, просвеща́я всю тварь.
Припев: Священному́чениче Кли́менте, моли́ Бо́га о на́с.
Та́йно очервлени́в твоя́ устна́ ча́шею му́дрости, Кли́менте,/ изры́гнул еси́ Боже́ственных уче́ний пучи́ну,/ потопля́ющую демоностра́шие,/ душа́м же челове́ческим источа́ющую спасе́ние.
Благослови́м Отца́ и Сы́на и Свята́го Ду́ха, Го́спода.
Я́ко пречестну́ю у́тварь, Це́рковь, стяжа́вши твоя́ Боже́ственная законоположе́ния,/ о тебе́ хва́лится/ и вся подвиза́ет твою́ па́мять ве́рою почита́ти во вся ве́ки.
И ны́не и при́сно и во ве́ки веко́в. Ами́нь.
Богородичен: Мари́е Де́во Богоро́дице,/ Бо́га Спа́са челове́ком ро́ждшая пло́тию,/ спаси́ ве́рою пою́щия Твое́ Рождество́/ и превознося́щия во вся ве́ки.

Песнь 9

Ирмос: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Припев: Священному́чениче Кли́менте, моли́ Бо́га о на́с.
Тече́ние твое́ соверши́в мно́гими по́двиги/ и несомне́нно соблю́д ве́ру Христо́ву,/ пра́ведным венце́м украси́лся еси́.
Припев: Священному́чениче Кли́менте, моли́ Бо́га о на́с.
Я́ко спасл еси́ о́трока дре́вле,/ удержа́на в мо́ри ле́тным обхожде́нием, му́чениче Христо́в,/ си́це глубины́ грехо́вныя и мене́ спаси́.
Сла́ва Отцу́ и Сы́ну и Свято́му Ду́ху.
Любо́вию тя чту́щия, Кли́менте страстоте́рпче,/ от напа́стей, и бед, и скорбе́й спаси́,/ моля́ Зижди́теля Христа́.
И ны́не и при́сно и во ве́ки веко́в. Ами́нь.
Богородичен: Ра́дости мое́ се́рдце испо́лни, Де́во,/ я́же ра́дости прие́мшая исполне́ние,/ грехо́вную печа́ль потребля́ющи.

Светилен

Ны́не благонаро́чит яви́ся нам день,/ иму́щи свяще́нных прее́мник, свяще́нных апо́стол,/ Петра́ ку́пно и Кли́мента,/ пропове́дники ве́ры и непобе́димыя му́ченики,/ и́хже ле́тнюю па́мять ве́рно соверша́ем вси.

Молитва 2-я священномученику Клименту, папе Римскому

О, вели́кий чудотво́рче, священному́чениче Кли́менте! Приклони́ся ны́не к на́шим воздыха́нием серде́чным и помози́ нам во вре́менном житии́ сем твори́ти вся в зако́не Бо́жии предло́женная, вся́каго же греха́ отмета́тися. Ты, вели́кий подви́жниче, от ю́ности твоея́ клеветы́ претерпе́вый, мно́гия же боле́зни душе́вныя и труды́ понесы́й, помоли́ся ко Го́споду Бо́гу о нас, гре́шных и недосто́йных раб Бо́жиих (имена), да твои́м предста́тельством и заступле́нием пода́ст Всеблаги́й и нам, гре́шным, си́лу и кре́пость во благоду́шии претерпева́ти клеветы́ челове́ческия и я́же на земли́ ско́рби и сохрани́ти за́поведи Его́, да просла́вим пречестно́е и великоле́пое и́мя Го́спода Бо́га и Его́ благода́ть, да́нную тебе́, во ве́ки веко́в. Ами́нь.

Молитва священномученику Клименту, папе Римскому

О, всечестны́й учениче́ верхо́внаго апо́стола Петра́, но́вый Пе́тре ве́ры Христо́вой, вторы́й Моисе́ю, священному́чениче Кли́менте, просвеще́нный уче́нием вели́каго апо́стола, венча́нный венце́м му́ченичества! Испроси́ на́м моли́твами твои́ми благода́ть Свята́го Ду́ха сохраня́ти ве́ру Христо́ву и церко́вныя спаси́тельныя обы́чаи, да расточи́тся безбо́жие. Умоли́, уго́дниче Бо́жий, Милосе́рдаго Творца́, да излие́тся на на́с благода́ть Свята́го Ду́ха, просвеща́ющая на́ши ду́ши, да попали́т Госпо́дь Бо́г страсте́й на́ших огнепа́льная стремле́ния, да сохрани́т на́с от вся́кия зло́бы, да спасе́т от напа́стей, бе́д и скорбе́й, и да пребу́дем ве́рными христиа́нами до конца́ жи́зни на́шея, сохраня́я в сердца́х на́ших па́мятование печа́лей, боле́зней и трудо́в твои́х, во сла́ву Бо́га Отца́ и Сы́на и Свята́го Ду́ха. Ами́нь.