Минея, 7 Января.

Глас 2

Песнь 1

Ирмос: Непроходи́мое волня́щееся мо́ре,/ Бо́жиим Свои́м веле́нием изсуши́вшему,/ и пешеше́ствовати сквозе́ е изра́ильтеския лю́ди наста́вльшему,/ Го́сподеви пои́м: сла́вно бо просла́вися.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Погружа́ема мя страсте́й бу́рею, Предте́че,/ моли́твами твои́ми предвари́в спаси́:/ безстра́стия бо сам был еси́ прия́телище честно́е и чисте́йшее,/ Го́споду свы́ше от младе́нства возложе́н.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Ра́дуяся, Богу предстоя́й А́нгел равноа́нгельнаго благовести́ Заха́рии честно́му,/ твоему́ свяще́нствующу отцу́,/ тя всебла́же́нне, Госпо́дня Предте́чу, и дру́га бы́вша.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Испо́лнен был еси́ Всесвята́го Ду́ха, еще́ во чре́ве твоея́ ма́тере вну́трь носи́мь,/ и взыгра́нием кра́сным Де́вственный Пло́д, ра́дуяся, возвести́л еси́,/ и поклони́лся еси́, проро́че всече́стне.
Сла́ва Отцу́ и Сы́ну и Свято́му Ду́ху.
Непрохо́дный всем челове́ком пе́рвее стра́нный пу́ть жития́ просе́кшаго/ и крести́вшаго Христа́ во Иорда́нских струя́х,/ восхва́лим Госпо́дня Предте́чу, Боже́ственнаго и Богому́драго.
И ны́не и при́сно и во ве́ки веко́в. Ами́нь.
Богородичен: Всеосвяще́нный Де́вства храм, во чре́ве Бо́га Сло́ва чревоноси́вшая,/ притека́ющия к Тебе́ и призыва́ющия, Чи́стая, спаси́ моли́твами Твои́ми,/бе́д разруша́ющи нахожде́ние, Всенепоро́чная.

Песнь 3

Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свя́т, я́коже Бог наш, и несть пра́веден, па́че Тебе́, Го́споди.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Непло́дствия поноше́ние разреши́л еси́, позна́в Де́вы Боже́ственное Рождество́,/ взыгра́л еси́ ра́дуяся во чре́ве ма́терни, всехва́льне,/ А́нгелов сожи́телю, Госпо́день Предте́че блаже́ннейший.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Стези́ предугото́вив Госпо́дни, ше́ствовал еси́ пред лице́м Его́, проро́че,/ я́ко свети́льник бо всем явля́яй сла́вы О́тчее сия́ние,/ я́вльшееся пло́тию нас ра́ди,/ показа́лся еси́ всех изя́щнейший.
Сла́ва Отцу́ и Сы́ну и Свято́му Ду́ху.
Возсия́л еси́, я́ко у́тро, пра́вды Со́лнце возвеща́я су́щим во тьме:/ всех бо спасе́ния ты был еси́ пропове́дник и Предте́ча,/ и всем глаго́лал еси́:/ ко Христу́ приступи́те ве́рою, и спасе́теся.
И ны́не и при́сно и во ве́ки веко́в. Ами́нь.
Богородичен: Ра́дость неизглаго́ланную прие́мши,/ зачала́ еси́ безсе́менно Твоего́ Влады́ку, всю, Богома́ти, вселе́нную призва́вшаго./ Ему́же и взыва́ем:/ я́ко несть свя́т, па́че Тебе́, Го́споди.

Седален, глас 8

Иорда́н струя́ми слу́жит, и Иоа́нн простира́ет ру́ку тле́нную/ я́вльшуся Тебе́, Неви́диме, пло́тию ко Креще́нию./ Но ов у́бо возвраща́шеся вспять со стра́хом,/ ов же а́бие держа́ще с тре́петом Тя, Нетле́ннаго./ Вои́стинну А́гнец Бо́жий, Исто́чник присноживо́тный,/ исто́чники же, и моря́, и челове́ки освяти́в:/ Тро́ица бо просия́ свы́ше,/ Сы́на Тя имену́ет Роди́тель, и Свя́тый Дух схо́дит.

Песнь 4

Ирмос: Пою́ тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́ заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Оскверне́нныя омы́ти водо́ю посла́лся еси́,/ от Влады́ки уготовля́я прия́ти взе́млющаго грех Христа́/ и лесть отгоня́ща Богоразу́мия заре́ю, всече́стне.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Я́да ми змии́на угрызе́ния исцели́ти, бла́же́нне, моли́, и́же Христа́ вода́ми крести́в Иорда́нскими,/ в ни́хже змие́в возгнезди́вшуюся зло́бу Спа́с сокруши́.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Му́дростию Бо́жиею укра́шен, прише́л еси́ Христопропове́дник:/ Вопию́щаго бо был еси́ зову́щий,– пока́йтеся! -/ глас, я́ко проро́к провозгласи́,/ Су́щаго па́че всех человек Тя показу́я на́м.
Сла́ва Отцу́ и Сы́ну и Свято́му Ду́ху.
Стра́нное и челове́ки нетре́нное живы́й житие́,/ предста́л еси́ вода́м, всеизря́днейше, Иорданским,/ глас О́тчий слы́шав, и прише́ствие Духа узре́в.
И ны́не и при́сно и во ве́ки веко́в. Ами́нь.
Богородичен: И́же вся созда́вый Госпо́дь, по на́м Сам зи́ждется,/ всели́вся, Всечи́стая, во утро́бу Твою́ всесвяту́ю,/ во о́браз челове́чь оде́яся, и Сво́й о́браз спасе́.

Песнь 5

Ирмос: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю Царю́ мира,/ просвети́ мя сия́нием Твои́м:/ ино́го бо, ра́зве Тебе́, бога не зна́ю.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Преесте́ственныя доброде́тели светлостьми́ озаре́н,/ я́ко от Небе́снаго тайновожде́ния вода́м предста́л еси́ Иорданским,/ креща́я и очища́я водо́ю, Предте́че,/ ве́рою душе́вною приступа́ющия тебе́.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Чи́стый и Нетле́нный Свет хотя́ крести́ти,/ сосу́д чисте́йший показа́лся еси́, Иоа́нне:/ бо́лий бо всех от Него́ предызбра́лся еси́, проро́ков же честне́йший,/ Проро́чествованнаго бо сподо́бился еси́ ви́дети.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
По́слан бы́в пред лице́м Госпо́дним,/ всего́ всем стези́ челове́ком показу́я,/ прикаса́ется, трепе́ща, верху́ Влады́чню, и креща́ет, глаго́ля, Предте́ча:/ ино́го, ра́зве Тебе́, бога не вем.
Сла́ва Отцу́ и Сы́ну и Свято́му Ду́ху.
Кто ви́де, или́ кто слы́ша,/ когда́ Безскве́рнаго созда́нию ве́рх преклоня́юща, руко́ю вся Содержа́щаго?/ Тем тре́петно Крести́тель вопия́ше:/ ино́го, па́че Тебе́, бога не вем.
И ны́не и при́сно и во ве́ки веко́в. Ами́нь.
Богородичен: Сын Бо́жий, Сын Твой, Де́во, я́ве показа́ся,/ дела́ я́ко Бог соверша́я во́лею еди́ною./ Те́мже тя вси́, и́стинно Богородицу, и госпо́дьственно имену́ем:/ ины́я бо ма́тере Бо́жия не вемы.

Песнь 6

Ирмос: В бе́здне грехо́вней валя́яся,/ неизсле́дную милосердия Твоего́ призыва́ю бе́здну:/ от тли, Бо́же, мя возведи́.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Ты Сло́ва глас предше́ствовал еси́,/ и я́ко светоно́сная звезда́ возсия́л еси́,/ провозвеща́я, Предте́че, ты пра́вды Со́лнца.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Земны́х попече́ний не уве́дел еси́,/ и Небе́сными наде́ждами обогати́лся еси́:/ на земли́, я́ко А́нгел, жи́знь соверши́л еси́, всеблаже́нне.
Сла́ва Отцу́ и Сы́ну и Свято́му Ду́ху.
Проро́ков тя печа́ть зна́ем,/ я́ко ве́тхаго и но́ваго хода́тая,/ и Крести́теля, и Предте́чу Спа́са Христа́ предвозвеща́ем.
И ны́не и при́сно и во ве́ки веко́в. Ами́нь.
Богородичен: Несказа́нно вои́стинну зача́тие,/ неизрече́нно Рожде́ство́ Твое́ и непостижи́мо всем верным познава́ется и ве́руется,/ Еди́на Богоневе́сто.

Кондак, глас 6

Плотска́го Твоего́ прише́ствия убоя́вся,/ Иорда́н стра́хом возвраща́шеся:/ проро́ческое же служе́ние исполня́я,/ Иоа́нн тре́петом спря́ташеся;/ А́нгельския чи́ни ужаса́хуся,/ зря́ще Тя, во струя́х пло́тию креща́ема;/ и вси́, су́щии во тьме, озаря́хуся,/ воспева́юще Тя, я́вльшагося, и просвети́вшаго вся.

Икос

Осле́пшу Ада́му во Еде́ме, яви́ся Со́лнце из Вифлее́ма/ и отве́рзе ему́ зе́ницы, омы́в сия́ Иорда́нскими вода́ми./ Очерне́вшему и омраче́нному Свет возсия́ неугаси́мый./ Уже́ ему́ несть но́щь, но всегда́ де́нь,/ е́же ко у́тру у́тро,/ его́ ра́ди роди́ся;/ к ве́черу бо сокры́ся, я́коже пи́шет,/ обре́те зарю́, возставля́ющую того́./ И́же к ве́черу пады́й измени́ся мра́ка/ и дости́же ко у́тру Я́вльшагося, и Просвети́вшаго вся.

Песнь 7

Ирмос: Купина́ в горе́ огненеопа́льная/ и росоно́сная пе́щь халде́йская я́ве предписа́ Тя, Богоневе́сто:/ Боже́ственный бо, Невеще́ственный в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся пое́м:/ благослове́н еси́, Бо́же оте́ц наших.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Свя́щенноде́йствовав Креще́ние и соверши́в, Предте́че,/ я́же от Бо́га я́ве да́нныя тебе́ тайны,/ я́ко а́гнец незло́бив священноде́йствуемый, прине́слся еси́ же́ртва./ Темже с тобо́ю согласно пое́м:/ благослове́н Бог оте́ц наших.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Но́вый Илия́ ты был еси́,/ со дерзнове́нием, Предте́че, и царя́ облича́я беззако́нновавша,/ и житие́ невеще́ственно показу́я на́м, я́коже о́н, требла́же́нне./ Темже с тобо́ю, проро́че, пое́м:/ благослове́н Бог оте́ц наших.
Сла́ва Отцу́ и Сы́ну и Свято́му Ду́ху.
И́же проро́ков бо́льший, и апо́столов, Предте́че, Христо́вых/ Боже́ственную честь насле́довав,/ ты зако́на исполне́ние, и нача́ло я́ве но́выя бла́года́ти яви́лся еси́./ Темже с тобо́ю, требла́же́нне, пое́м:/ благослове́н Бог оте́ц наших.
И ны́не и при́сно и во ве́ки веко́в. Ами́нь.
Богородичен: Песнослове́ньми Всечи́стую и Богоприя́тную Влады́чицу,/ бла́гочести́вии, досто́йно вси воспои́м,/ я́ко Бога ро́ждшую Единоро́днаго нам челове́ком я́вльшася./ К Нему́же, ве́рнии, согласно пое́м:/ благослове́н Бог оте́ц наших.

Песнь 8

Ирмос: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Тя, и́же на земли́ равноа́нгельна я́вльшася премене́нным житие́м/ и всех вы́шша, Иоа́нне всебла́же́нне, ра́достно почита́ем, зову́ще:/ благослови́те, вся дела́ Госпо́дня, Го́спода.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Еди́но в Трех Боже́ства́ Существо́, Единосу́щными Ипоста́сьми, проро́че, научи́л еси́:/ гла́сом бо Роди́теля, и прише́ствием Духа позна́л еси́ Креща́емаго:/ Сло́ва Бо́жия Присносу́щнаго.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
У́тро мы́сленное, Со́лнце возвеща́я, е́же из Де́вы возсия́вшее,/ из непло́дныя предте́кл еси́, Иоа́нне всече́стне,/ и А́гнца пропове́дал еси́, ми́ра грех человеколю́бием взе́млющаго.
Благослови́м Отца́ и Сы́на и Свята́го Ду́ха, Го́спода.
Свы́ше нас ны́не назира́я, бла́же́нне, твои́ми моли́твами сохрани́,/ Боже́ственному пропове́данию после́дующия твоему́, всебла́же́нне,/ и во уче́ниих пребыва́юще, Предте́че, Боже́ственных и спаси́тельных твои́х догма́тов.
И ны́не и при́сно и во ве́ки веко́в. Ами́нь.
Богородичен: Сла́вы О́тчия зачала́ еси́ несказа́нно Преве́чное Осия́ние/ и Сло́во Безнача́льное, в нача́ле су́щее разумева́емое,/ и ны́не из Тебе́ перворожде́нна, Всечи́стая, бы́вша неизме́нно тва́ри.

Песнь 9

Ирмос: Я́же пре́жде со́лнца свети́льника Бо́га возсия́вшаго,/ пло́тски к на́м прише́дшаго из боку́ Де́ви́чу,/ неизрече́нно воплоти́вшая, Благослове́нная Всечи́стая,/ Тя Богородице, велича́ем.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Из пусты́ни Предте́ча глас Сло́во показу́ет, пло́тски к на́м прише́дшее,/ и прису́щее прера́достно крести́ти гото́вится,/ ду́ши очища́ющее от греха́ ве́ры ра́ди.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Благода́ть же и зако́н хода́тая тя че́стна я́ве предлага́ют:/ о́в у́бо запеча́тствующаго, о́вая же начина́ющаго,/ всех проро́ков Сло́вом предпочте́ннаго,/ па́че ви́димых пожи́вша, всече́стне.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Безтеле́сным подо́бное житие́ показа́в, со А́нгельскими ли́ки весели́тся/ и, престо́лу предстоя́ Влады́чню, ра́дуется,/ восхваля́ющим оставле́ние и спасе́ние испроша́я.
Припев: Святы́й вели́кий Иоа́нне, Предте́че Госпо́день, моли́ Бо́га о на́с.
Богородичен: За благоутро́бие всех Изба́витель Челове́к быва́ет/ и плотско́е рожде́ние прие́млет,/ человеколю́бно па́че челове́ков сы́й Человеколю́бец,/ из де́вственнаго ложесна́ Твоего́, Богороди́тельнице Всеблаже́нная.

Светилен

Стези́ предугото́вал еси́ чу́дно Го́сподеви:/ глас бо был еси́ Того́ прише́ствия и пропове́дник и́стиннейший,/ проро́ков превы́шший, блаже́нне Иоа́нне:/ ты Свет ви́дел еси́, я́ко неизглаго́ланное Его́ сконча́в смотре́ние.

Молитва Предтече и Крестителю Господню Иоанну

Крести́телю Христо́в, пропове́дниче покая́ния, ка́ющагося не презри́ мене́, но, совокупля́яся с во́и Небе́сными, моли́ся ко Владыце за мене́, недосто́йнаго, уны́лаго, немощна́го и печа́льнаго, во мно́гия бе́ды впа́дшаго, утружде́ннаго бу́рными по́мыслы ума́ моего́. Аз бо есмь верте́п злых дел, отню́дь не име́яй конца́ грехо́вному обы́чаю, пригвожде́н бо есть ум мой земны́м веще́м. Что сотворю́, не вем, и к кому́ прибе́гну, да спасе́на бу́дет душа́ моя́, то́кмо к тебе́, свя́тый Иоа́нне, благода́ти тезоимени́те, я́ко тя пред Го́сподем, по Богоро́дице, вем бо́льша быти рожде́нных всех: ты бо сподо́бился еси косну́тися верху́ Царя́ Христа́, взе́млющаго грехи́ ми́ра, А́гнца Божия. Его́же моли́ за гре́шную мою́ ду́шу, да поне́ отны́не, в пе́рвый-надеся́ть час, понесу́ тяготу́ благу́ю и прииму́ мзду с после́дними. Ей, Крести́телю Христо́в, честны́й Предте́че, кра́йний проро́че, пе́рвый во благода́ти му́чениче, по́стников и пусты́нников наста́вниче, чистоты́ учи́телю и бли́жний дру́же Христо́в, тя молю́, к тебе́ прибега́ю, не отри́ни мене́ от твоего́ заступле́ния, но возста́ви мя, па́дшагося мно́гими грехи́, обнови́ ду́шу мою́ покая́нием, я́ко вторы́м креще́нием, поне́же обо́его нача́льник еси́, креще́нием омыва́яй грех, покая́ние же пропове́дуяй во очище́ние кого́ждо дел скве́рных; очи́сти у́бо мя, грехми́ оскверне́ннаго, и понуди́ вни́ти, а́може ничто́ же скве́рно вхо́дит, в Ца́рствие Небе́сное, Ами́нь.