Акафист преподобному Никите Костромскому, ученику преподобного Сергия Радонежского

Кондак 1

Избра́нный от благочести́ваго ро́да подви́жниче, преподо́бне о́тче на́ш Ники́то, благочéстием и труды́ мно́гими Бо́гу угоди́вый, приими́ похва́льное пе́ние от на́с, любо́вию чтýщих святýю па́мять твою́, и я́ко име́я вéлие дерзновéние ко Го́споду, моли́ Христа́ Бо́га о спасéнии дyш на́ших, да зовéм ти: Ра́дуйся, преподо́бне Ники́то, гра́да Костромы́ усéрдный застýпниче.

Икос 1

А́нгела земна́го яви́ тя Госпо́дь земли́ на́шей, я́ко во оби́телех ея́ до́бре подвиза́вся, кро́тким и ти́хим житиéм просия́л еси́. Те́мже и Христо́с отвéрзе ти врата́ небе́cная и ли́ку преподо́бных сочета́, мы же благода́рне воспева́ем си́це:
Ра́дуйся, земли́ Росто́вския прозябéние;
ра́дуйся, благочести́ваго ро́да украшéние.
Ра́дуйся, Сéргия преподо́бнаго боголюби́вый сро́дниче;
ра́дуйся, смирéнный его́ учениче́ и усéрдный послýшниче.
Ра́дуйся, от младéнчества любо́вь ко Го́споду яви́вый;
ра́дуйся, да́же до смéрти ю́ сохрани́вый.
Ра́дуйся, ко и́ноческому житию́ от ю́ности прилежа́вый;
ра́дуйся, а́нгельский нрав стяжа́вый.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 2

Ви́дев Госпо́дь усéрдие твое́ ко и́ноческому житию́, напра́ви стопы́ твоя́ ко преподо́бному сро́днику твоему́ а́вве Сéргию, от него́же благочéстию научéн, любо́вь к доброде́телем стяжа́л еси́ и, послуша́нию прилежа́в, о́браз трудолю́бия яви́л еси́. Сего́ ра́ди, зря́ще о тебе́ благýю во́лю Госпо́дню, воспева́ем Бо́гу: Аллилу́иа.

Икос 2

Ра́зум просвещéн име́ти жела́я, в зако́не Госпо́дни поуча́лся еси́ дeнь и но́щь, преподо́бне Ники́то, та́же и Ле́ствицу свята́го Иоа́нна списа́л еси́, да ле́ствицею доброде́телей и́ноческих на не́бо взы́деши. Мы же, дивя́щеся усéрдию твоему́, вопиéм ти:
Ра́дуйся, роди́телей благи́х плод до́брый и избра́нный;
ра́дуйся, благочéстие от них восприéмый.
Ра́дуйся, от ю́ности по́стническому житию́ прилежа́вый;
ра́дуйся, Сéргию преподо́бному ученика́ себе́ соде́лавый.
Ра́дуйся, в послуша́нии тому́ усéрдно пребыва́вый;
ра́дуйся, наставлéньми его́ мно́гия доброде́тели стяжа́вый.
Ра́дуйся, чистоты́ сердéчныя усéрдный храни́телю;
ра́дуйся, уста́вов и́ноческих изря́дный ревни́телю.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 3

Си́лою Вы́шняго укрепля́емь, мно́гая ле́та во оби́тели Святы́я Тро́ицы подвиза́лся еси́, о́тче Ники́то, и пострижéние и́ноческое от свята́го игýмена Сéргия восприéм, о́браз пра́веднаго жития́ его́ в сéрдцы слага́л еси́, и свиде́тель ди́вных чудéс и по́двигов его́ соде́лался еси́, воспева́я Бо́гу: Аллилу́иа.

Икос 3

Име́я по вся́ дни́ упова́ние на Бо́га, во́ли твоея́ отрéклся еси́, преподо́бне о́тче на́ш Ники́то, мы же, воспева́юще добронра́вное житие́ твое́, прославля́ем тя та́ко:
Ра́дуйся, нищету́ духо́вную возлюби́вый;
ра́дуйся, мудрова́ние плотско́е умертви́вый.
Ра́дуйся, слеза́ми мно́гими сéрдце очи́стивый;
ра́дуйся, богомы́слием ум горе́ возвы́сивый.
Ра́дуйся, молча́ния Исаа́киева благогове́йный свиде́телю;
ра́дуйся, послуша́ния Ни́конова ди́вный ревни́телю.
Ра́дуйся, Михéевым словесе́м со стра́хом внима́вый;
ра́дуйся, Си́монову благоразýмию подража́вый.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 4

Бýрю помышлéний послуша́нием усмиря́я, благословéние преподо́бнаго Сéргия кро́тко восприя́л еси́, и к но́вому по́двигу устреми́лся еси́, о́тче Ники́то. Те́мже к преподо́бному Афана́сию пришéд, во оби́тели Высо́цской гра́да Сéрпухова всели́лся еси́, Бо́гови вопия́: Аллилу́иа.

Икос 4

Слы́шавше бра́тия Сéрпуховския оби́тели о богоуго́днем житии́ твоéм, преподо́бне Ники́то, с любо́вию прия́ша тя, я́ко отца́ духо́внаго, и попечéние о душа́х свои́х ввери́ша тебе́, а́ще и ле́ты юн бя́ше. Мы́ же, дивя́щеся разсуждéнию твоему́ и благода́ти, в тебе́ бы́вшей, взыва́ем си́це:
Ра́дуйся, преподо́бнаго Сéргия досто́йный учениче́;
ра́дуйся, преподо́бнаго Афана́сия смирéнный помо́щниче.
Ра́дуйся, дар разсуждéния послуша́нием стяжа́вый;
ра́дуйся, у́мному де́ланию со усéрдием прилежа́вый.
Ра́дуйся, ле́ствицею доброде́телей от си́лы в си́лу восходи́вый;
ра́дуйся, обе́ты и́ноческия, я́ко зало́г спасéния, возлюби́вый.
Ра́дуйся, гра́д Кострому́ моли́твами твои́ми утверди́вый;
ра́дуйся, зéмлю Костромскýю стопа́ми твои́ми освяти́вый.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 5

Богомýдрый игýмен оби́тели Сéрпуховския яви́лся еси́, о́тче Ники́то, словесы́ святы́х оте́ц всeх назида́я, ка́ко подоба́ет в единéнии и любви́ пребыва́ти, моли́тве и послуша́нию прилежа́ти, и крéстным путéм ко спасéнию шéствовати, взыва́я Бо́гу: Аллилу́иа.

Икос 5

Ви́дев разорéние оби́тели твоея́ от нечести́вых иноплеме́нник, преподо́бне Ники́то, мно́гия по́двиги и труды́ положи́л еси́, па́ки устроя́я благоле́пие ея́, и я́ко ми́лостивый отéц, о лю́дех, кро́ва лишéнных, а́лчущих и в нýждах сýщих, попечéние име́л еси́. Мы же, прославля́юще богоуго́дное житие́ и доброде́тели твоя́, вопиéм ти:
Ра́дуйся, благочи́ния монасты́рскаго неуста́нный блюсти́телю;
ра́дуйся, уста́ва церко́внаго усéрдный ревни́телю.
Ра́дуйся, добротолю́бия и́стинный учи́телю;
ра́дуйся, скорбя́щих и стра́ждущих до́брый попечи́телю.
Ра́дуйся, свети́льниче от Го́спода возжжéнный;
ра́дуйся, благода́тию Ду́ха Свята́го освящéнный.
Ра́дуйся, в нашéствии иноплеме́нник все упова́ние на Бо́га возложи́вый;
ра́дуйся, кро́тостию и смирéнием мно́жества мона́хов собра́вый.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 6

Пропове́дует земля́ Ру́сская смирéние твое́ и любо́вь ко и́ноческому по́двигу, преподо́бне Ники́то: ты бо, уединéния взыскýя, и в Покро́вскую оби́тель близ гра́да Бо́ровска всели́вся, бра́тию ея́ я́ко ста́рец богомýдрый окормля́л еси́, воспева́я Бо́гу: Аллилу́иа.

Икос 6

Возси́ял еси́ во оби́тели Покро́вской свя́тостию жития́ твоего́, прехва́льне Ники́то, и ю́наго подви́жника, преподо́бнаго Пафнýтия, возрасти́л еси́, и́же вся́кому мона́шескому де́ланию от тебе́ научи́ся. Мы же, прославля́юще житие́ твое́, воспева́eм тя:
Ра́дуйся, свети́льниче, пýть ко спасéнию указýяй;
ра́дуйся, подви́жниче, горе́ сердца́ при́сно возводя́й.
Ра́дуйся, доброде́тельнаго жития́ богомýдрый учи́телю;
ра́дуйся, преподо́бнаго Пафнýтия искýсный наста́вниче.
Ра́дуйся, мно́гия и́ноки Бо́гови возрасти́вый;
ра́дуйся, тем я́ко отéц милосéрдный бы́вый.
Ра́дуйся, преподо́бне, в по́двизех чад твои́х укрепля́вый;
ра́дуйся, словесы́ твои́ми в терпе́нии их утвержда́вый.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 7

Хотя́ по заве́ту преподо́бнаго Сéргия в се́верней стране́ о́бщее житие́ и́ноков устро́ити, прии́де прéжде во оби́тель Тро́ицкую помоли́тися, о́тче Ники́то. Зде́ же, узре́в чудеса́ от мощéй отца́ твоего́ духо́внаго, благода́рственне воспе́л еси́ Бо́гу: Аллилу́иа.

Икос 7

Но́ваго уго́дника чудéс самови́дец бы́ти сподо́бився, дýхом укрепи́лся еси́, преподо́бне о́тче Ники́то, да в се́верную страну́ изшéд, сла́ву учи́теля твоего́ и печа́льника земли́ рýсския распространи́ши. Мы́ же, я́ко ве́рнаго ученика́ Сéргиева тя почита́юще, прославля́ем си́це:
Ра́дуйся, ди́внаго учи́теля ве́рный учениче́;
ра́дуйся, благода́ти того́ досто́йный приéмниче.
Ра́дуйся, заве́тов преподо́бнаго Сéргия исполни́телю;
ра́дуйся, уста́вов его́ в и́ноческих оби́телех насади́телю.
Ра́дуйся, мно́гими доброде́тельми житие́ украси́вый;
ра́дуйся, в ли́це ученико́в Сéргиевых просла́вленный.
Ра́дуйся, смирéние в основа́ние подвиго́в положи́вый;
ра́дуйся, исполнéнием за́поведей Бо́жиих на Не́бо возшéдый.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 8

Стра́нно и ди́вно бы́сть пришéствие твое́ во гра́д Кострому́, преподо́бне о́тче Ники́то: подоба́ет бо си́льным и ю́ным в да́льния страны́ тещи́ и но́вое служéние приима́ти. Ты́ же, нéмощен сы́й и очи́ма неду́жен, сие́ сверши́л еси́, воспева́я Даю́щему тебе́ кре́пость: Аллилу́иа.

Икос 8

Все́ упова́ние на Го́спода возложи́в, преподо́бне Ники́то, в преде́лы Костромски́я изшéл еси́, и́деже в пусты́ннем ме́сте оби́тель Богоявлéнскую устро́ив, мно́жество и́ноков собра́л еси́. Сего́ ра́ди похваля́ем тя:
Ра́дуйся, благословéние духо́внаго отца́ испо́лнивый;
ра́дуйся, зéмлю Костромскýю пришéствием твои́м освяти́вый.
Ра́дуйся, дрéвний град моли́твами твои́ми утверди́вый;
ра́дуйся, оби́тель Богоявлéния в нeм основа́вый.
Ра́дуйся, взыскýющия и́ноческаго по́двига о́крест себе́ собра́вый;
ра́дуйся, боголюби́вому о́бщему житию́ те́х научи́вый.
Ра́дуйся, страну́ Костромскýю по́двиги твои́ми просла́вивый;
ра́дуйся, лю́ди ея́ на спасéния стези́ наста́вивый.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 9

Вся́к правосла́вный похваля́ет терпе́ние твое́, преподо́бне о́тче Ники́то: ты бо, гла́д и хла́д, вся́кия напа́сти и нашéствие иноплемéнных в многотрýднем и ско́рбнем житии́ претерпева́я, Бо́га за вся́ благодари́л еси́, воспева́я Ему́: Аллилу́иа.

Икос 9

Вети́йствующий язы́к не мо́жет изрещи́ оби́лие любве́ твоея́ и вели́каго смирéния: ты бо, преподо́бне, многоле́тен сый и са́ном архимандри́та облечéн, со смирéнием всéм послужи́л еси́. Сего́ ра́ди прославля́ем тя:
Ра́дуйся, свети́льниче, игýменом Ра́донежским возжжéнный;
ра́дуйся, сосýде, даро́в Ду́ха Свята́го испо́лненный.
Ра́дуйся, нището́ю духо́вною себе́ обогати́вый;
ра́дуйся, глубино́ю смирéния высоту́ Богомы́слия показа́вый.
Ра́дуйся, преподо́бне, христоподража́тельный нрав стяжа́вый;
ра́дуйся, вся ско́рби благодýшне терпéвый.
Ра́дуйся, слепо́тствуя телéсне, духо́вное зре́ние име́вый;
ра́дуйся, терпе́нием скорбéй дар разсуждéния обреты́й.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 10

Спасти́ хотя́ дýши приходя́щих к тебе́, Богомýдре о́тче Ники́то, по́двиг настоя́тельства терпели́во понéсл еси́, и вся́кое попечéние о лю́дех твои́х на ра́мо взéм, лени́выя облича́л еси́, немощны́я укрепля́л еси́, скорбя́щия утеша́л еси́, да вси́ возмо́гут пе́ти Го́споду: Аллилу́иа.

Икос 10

Стена́ и прибе́жище бы́сть тебе́, о́тче наш Ники́то, ико́на Пресвяты́я Богоро́дицы, именýемая Фео́доровская, пред нéюже молéние тéплое за вся́ лю́ди возноси́л еси́. Сего́ ра́ди зовéм ти́:
Ра́дуйся, жития́ и́ноческаго во гра́де Костроме́ мýдрый устрои́телю;
ра́дуйся, пра́вил о́бщаго жития́ усéрдный насади́телю.
Ра́дуйся, оби́тели Богоявлéнской кре́пкое основа́ние;
ра́дуйся, мона́шествующих при́сная похвало́.
Ра́дуйся, словесы́ твои́ми ча́да духо́вная напита́вый;
ра́дуйся, о́ная на пýть спасéния наста́вивый.
Ра́дуйся, приходя́щия к тебе́ с любо́вию приима́вый;
ра́дуйся, в нýждах сýщим потре́бная подава́вый.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 11

Пе́ние всеумилéнное Го́споду принéсл еси́, преподо́бне о́тче Ники́то, егда́ ча́с кончи́ны твоея́ и разрешéния от трудо́в и по́двигов мно́гих прии́де, ты́ бо, ду́х тво́й в ру́це Бо́жии со благодаре́нием предая́, воззва́л еси́: Аллилу́иа.

Икос 11

Свети́льника земли́ Ру́сския ве́мы тя́, Богоно́сне о́тче наш Ники́то: ты бо, о́гнь любве́ Божéственныя от преподо́бнаго Сéргия восприéм, сердца́ мно́гая возжéгл еси́. Те́мже похваля́ем тя словесы́ сицевы́ми:
Ра́дуйся, я́ко свети́льник земли́ Ру́сския возсия́вый;
ра́дуйся, в стране́ Костромско́й по́прище многотрýдное сконча́вый.
Ра́дуйся, во оби́тели Богоявлéнской дýх тво́й Бо́гу преда́вый;
ра́дуйся, кончи́ною пра́ведною назида́ние всéм сотвори́вый.
Ра́дуйся, гра́д Кострому́ моща́ми твои́ми освяти́вый;
ра́дуйся, во оби́тели Небе́cныя всели́выйся.
Ра́дуйся, я́ко Престо́лу Вседержи́теля предстои́ши;
ра́дуйся, я́ко о стране́ на́шей при́сно хода́тайствуеши.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 12

Благода́ть чудéс от гро́ба твоего́ источа́еши все́м, с любо́вию притека́ющим к тебе́, преподо́бне о́тче Ники́то. Мы же, зря́ще таковýю ми́лоcть Бо́жию, нам гре́шным подава́емую предста́тельством твои́м, уми́льно взыва́ем: Аллилу́иа.

Икос 12

Почита́ем тя, уго́дниче Бо́жий Ники́то, наста́вниче мона́хов и собесе́дниче А́нгелов, и воспева́ем по́двиги твоя́, и́миже Це́рковь Рýсскую прославля́еши и нас в Правосла́вии укрепля́еши. Сего́ ра́ди с любо́вию взыва́ем ти:
Ра́дуйся, я́ко мно́гия оби́тели в земли́ на́шей наста́вника тя почита́ют;
ра́дуйся, я́ко и́ноцы и мирсти́и к предста́тельству твоему́ с ве́рою притека́ют.
Ра́дуйся, я́ко моли́твами твои́ми от скорбéй и бе́д огражда́еши;
ра́дуйся, я́ко чудеса́ от гро́ба твоего́ неоскýдно источа́еши.
Ра́дуйся, я́ко в со́нмех святы́х ны́не Бо́га прославля́еши;
ра́дуйся, яко в ли́це преподо́бных пред Престо́лом Святы́я Тро́ицы пребыва́еши.
Ра́дуйся, я́ко в невечéрнем све́те ны́не со А́нгелы ликýеши;
ра́дуйся, я́ко и о на́с пред Бо́гом тéпле хода́тайствуеши.
Ра́дуйся, преподо́бне Ники́то, гра́да Костромы́ усéрдный застýпниче.

Кондак 13

О, преподо́бне и богоно́сне о́тче Ники́то! Приими́ ны́не приноси́мое тебе́ похва́льное пе́ние, и не забýди ча́д твои́х, любо́вию чтýщих тя. Умоли́ Го́спода си́л дарова́ти на́м во вся́цем благочéстии и чистоте́ жи́ти и Ца́рствия Небе́cнаго дости́гнути, да с тобо́ю воспоéм Бо́гу: Аллилу́иа.
[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Кондак 1

Молитва

О, преподо́бне о́тче на́ш Ники́то, уго́дниче Бо́жий, моли́твенниче о душа́х на́ших и тéплый застýпниче! Ты́ во дни́ земна́го жития́ твоего́, мно́гия труды́ мона́шеския подъéм, дýшу покая́нием и смирéнием очи́стил еси́, и я́ко отéц духо́вный любо́вию всем послужи́л еси́. Сего́ ра́ди в Небе́cных оби́телех пребыва́еши, иде́же дерзновéнно хода́тайствуеши о нас. Мо́лим тя́, о́тче преподо́бне, моли́ Ми́лоcтиваго Бо́га земно́е по́прище нам непреткновéнно преити́ и от разжжéнных стре́л лука́ваго сохрани́тися, во еже бы́ти на́м ча́дом Бо́жиим и в за́поведех Его́ непоро́чно ходи́ти. Моли́, о́тче святы́й, земли́ на́шей от бед изба́витися, гра́ду Костроме́ и всéй стране́ на́шей в правосла́вии утверди́тися, да при́сно сла́вим Отца́ и Сы́на и Свята́го Ду́ха во ве́ки веко́в. Ами́нь.