Минея, 24 Октября.

Глас 8

Песнь 1

Ирмос: Поим Го́сподеви,/ проведшему люди Своя сквозе Чермное море,/ я́ко един славно прославися.
Припев: Пресвята́я Богоро́дице, спаси́ на́с.
Моря житейскаго волнами потопляем и напастьми лютыми одержим,/ ко пристанищу устремихся невла́емому, покрову Твое́му:/ те́мже мя избави, Богоро́дице, от лю́тых.
Припев: Пресвята́я Богоро́дице, спаси́ на́с.
Положи Тя пристанище сущим в бедах, Чи́стая, Бог, И́же от Тебе́ благоволивый восприяти плоть./ Темже Ти, припадающе, взываем:/ даруй помощь Твою́ рабом Твоим.
Припев: Пресвята́я Богоро́дице, спаси́ на́с.
Едина Благословенная и Богорадованная,/ Яже Радость человеком рождши неизреченную,/ печали отими души моея, молюся, и возвесели се́рдце мое.
Припев: Пресвята́я Богоро́дице, спаси́ на́с.
Избави мя, Пречистая, бесовския прелести,/ озлобления же, и вреда, и искушения,/ да верою Тя сла́влю, сущую по Бозе Заступницу и покров мой.
Сла́ва Отцу́ и Сы́ну и Свято́му Ду́ху.
Яже ненадеющихся надежда, падших исправление,/ печальных утеше́ние, Свет Боже́ственный рождшая,/ душу мою, сущую во тьме, просвети.
И ны́не и при́сно и во ве́ки веко́в. Ами́нь.
Я́ко Гаврии́л Деве, приидите, ве́рнии, и мы вопие́м благоговейно:/ вои́стинну укра́шена еси́, Чи́стая, рождшая Радость; ра́дуйся, Благословенная.

Песнь 3

Ирмос: Ты еси́ утверждение/ притекающих к Тебе́, Го́споди,/ Ты еси́ свет омраченных,/ и поет Тя дух мой.
Припев: Пресвята́я Богоро́дице, спаси́ на́с.
Ты еси́ земнородных упование, и помощь, и радость, покров и прибежище, Влады́чице, Ма́ти Живота./ Темже Тя молим: Твою́ помощь низпосли́ всем поющим Тя, Пречистая.
Припев: Пресвята́я Богоро́дице, спаси́ на́с.
Иже Тобо́ю избавльшеся от бед/ и Тебе́ ради радость получивше, Ма́ти Безневестная,/ я́ко Подательницу благую и Заступницу благохва́льну вси прославляем.
Припев: Пресвята́я Богоро́дице, спаси́ на́с.
Благословен Плод чрева Твоего́, Де́во Богоро́дице, всех радосте:/ Радость бо всему́ ми́ру родила еси́ и Веселие,/ разгоняющее печаль греховную, Богоневесто.
Припев: Пресвята́я Богоро́дице, спаси́ на́с.
Тя Хранительницу, Пресвятая, в напастех стяжах;/ Тебе́ по Бозе мою Предстательницу и́мам неусы́пну;/ Тебе́ да обрящу, Пречистая, избавляющую мя в день Суда́ всякаго осуждения.
Сла́ва Отцу́ и Сы́ну и Свято́му Ду́ху.
Возвеличи ми́лость и заступление, Пречистая, Твоих молитв на мне/ и избави мя от напастей и скорбе́й,/ Радость ми́ру рождшая.
И ны́не и при́сно и во ве́ки веко́в. Ами́нь.
Яже радости приемшая исполнение, приими́ от нас, раб Твоих, целова́ние Арха́нгелово:/ ра́дуйся, Радость рождшая миру;/ ра́дуйся, ста́мно, из Неяже манна Небе́сная всем ве́рным даровася;/ ра́дуйся, Благословенная.

Седален, глас 7

Ра́дуйся, Солнца облаче мысленнаго и неизреченнаго, Влады́чице;/ ра́дуйся, всесветлая свеще́; ра́дуйся, све́щниче всезлаты́й;/ Тобою, Пресвятая, Ева избавися от клятвы./ Но я́ко имущая дерзновение ко Благопременному Сыну Твое́му и Бо́гу,/ ма́тернею молитвою не оскудей о нас моли́тися, Пречистая.

Песнь 4

Ирмос: Из горы приосене́нныя, Слове, пророк/ единыя Богоро́дицы,/ хотяща воплотитися, Боговидно усмотри́/ и со страхом славословяще си́лу Твою́.
Припев: Пресвята́я Богоро́дице, спаси́ на́с.
От великих и различных прегрешений же и напастей всегда спасаеши мя;/ те́мже Тя я́ко рождшую Го́спода молю/ и к Тебе́ прибегаю, непобедимей по́мощи скорбящим:/ от бед изведи мольбами Твоими.
Припев: Пресвята́я Богоро́дице, спаси́ на́с.
Боже мой Милосе́рде, Боже Человеколюбче, Воли́телю милости,/ ны́не на мя излий Твою́ ми́лость:/ молит Тя надежда и Заступница моя, Ма́ти Твоя́.
Припев: Пресвята́я Богоро́дице, спаси́ на́с.
Милость Твою́ и милосердие на рабы Твоя́, Чи́стая, простри́,/ при́сно молящия Тя всякия скорби и муки избавляющи моли́твами Твоими.
Припев: Пресвята́я Богоро́дице, спаси́ на́с.
Ра́дуйся, красная пала́то Слова, девственный чертоже Царя;/ ра́дуйся, похвало всех Безплотных;/ ра́дуйся, человеков радосте и помоще и упование.
Сла́ва Отцу́ и Сы́ну и Свято́му Ду́ху.
Спасение подаждь ми душе́вное и теле́сное, Пренепорочная,/ и недугующему даруй цельбу́ и лю́тых избавление.
И ны́не и при́сно и во ве́ки веко́в. Ами́нь.
О соде́яниих моих лукавых и прегрешениих многих кто возможет умолити Судию,/ аще не Ты, Чи́стая, едина согрешающих Заступнице.

Песнь 5

Ирмос: Мрак души моея разжени, Светодавче Христе́ Бо́же,/ началоро́дную тьму изгнав бездны,/ и даруй ми свет повелений Твоих, Слове,/ да утренюя, сла́влю Тя.
Припев: Пресвята́я Богоро́дице, спаси́ на́с.
Добро́ту Тя Иаковлю возлюби Бог, Де́во Отроковице,/ украшая вся Тобою, омрачившияся преступлением пе́рвее.
Припев: Пресвята́я Богоро́дице, спаси́ на́с.
Душу мою сохрани, я́ко зе́ницу ока, под кровом крилу́ Твое́ю, Благая Пречистая,/ и от духо́в лукавых томления и мучения избави.
Припев: Пресвята́я Богоро́дице, спаси́ на́с.
Избавльшеся Тобо́ю праматерния печали, Богородительнице, утешения исполнени быхом,/ Веселие всем рождшая и всемирную Радость:/ темже, Всепетая, Твоя́ песнословцы от бед Твоими моли́твами соблюди.
Припев: Пресвята́я Богоро́дице, спаси́ на́с.
Благодарим Тя, избавльшеся Тобо́ю грехов многих, и немощей, и болезней, и недуг лю́тых, Пречистая Влады́чице:/ надежда бо еси́ тверда́ Твоим ве́рным рабом.
Сла́ва Отцу́ и Сы́ну и Свято́му Ду́ху.
С Боже́ственным сошедшеся Гаврии́лом, возопиим Богоро́дице верно:/ ра́дуйся, Де́во Святая, Благодатная, Господь с Тобою,/ И́же Тебе́ ради, потребив печаль, подаде́ ми́ру радование.
И ны́не и при́сно и во ве́ки веко́в. Ами́нь.
Болящую ду́шу мою́ исцели,/ рождшая всех Вземлющаго неду́ги, Пречистая Влады́чице.

Песнь 6

Ирмос: Содержи́ма мя приими, Человеколюбче, грехи мно́гими/ и припадающа щедротам Твоим,/ я́ко пророка, Го́споди, и спаси́ мя.
Припев: Пресвята́я Богоро́дице, спаси́ на́с.
В нощи́ и во дни, я́ве и втай под Твой прибегаем кров, Пречистая Де́во,/ и́же Тя верно славословящии.
Припев: Пресвята́я Богоро́дице, спаси́ на́с.
В напастех Заступницу Тя и́мамы тверду,/ в скорбех крепкое спасе́ние, покой в печалех,/ в беда́х помощь, Приснодево.
Припев: Пресвята́я Богоро́дице, спаси́ на́с.
Добро́та честных святы́х А́нгел,/ радование человек всех Ты еси́, Богоро́дице Де́во:/ Ты мя к животу настави.
Сла́ва Отцу́ и Сы́ну и Свято́му Ду́ху.
Палата Царя Славы и огнезрачный была еси́ Престол, Де́во,/ Херувим превышши и Серафим:/ те́мже Тя вся́кое дыха́ние славит, я́ко Матерь Зижди́теля.
И ны́не и при́сно и во ве́ки веко́в. Ами́нь.
Ра́дуйся, клеще́ Угля Божественнаго;/ ра́дуйся, пророков печать и апостолов похвало́, Пречистая Богоро́дице,/ Ея́же ради от истления свободи́хомся,/ бе́здну щедро́т ро́ждши, Богоро́дице Де́во,/ ско́рбных жития́ душу мою спаси́/ и радости духовныя двери отве́рзи ми:/ на Тя бо едину надежду возложи́х.

Кондак, глас 4

Не и́мамы иныя помощи,/ не и́мамы иныя надежды,/ разве Тебе́, Влады́чице./ Ты нам помози́:/ на Тебе́ надеемся и Тобо́ю хвалимся,/ Твои́ бо есмы раби,/ да не постыдимся.

Икос

Простри́ дла́ни Твоя́, имиже всех Владыку я́ко Младенца прияла еси́ за множество благости:/ не остави нас, всегда надеющихся на Тя, бо́дренною Твое́ю молитвою́,/ и неисчетною просты́нею уще́дри нас,/ и подаждь душам нашим милосердие Твое́, во веки источающи,/ Тебе́ бо имамы гре́шнии Заступницу от находящих на ны бед и зол./ Но я́ко имущи милосердия щедроты,/ ускори́ на молитву и потщися на умоление,/ предстательствующи присно, Богоро́дице, чту́щих Тя.

Песнь 7

Ирмос: Бо́жия снизхождения/ огнь устыде́ся в Вавилоне иногда:/ сего ради о́троцы в пещи́ радованною ногою,/ я́ко во цве́тнице, лику́юще, поя́ху:/ благослове́н еси́, Боже отец на́ших.
Припев: Пресвята́я Богоро́дице, спаси́ на́с.
Водвори́хомся в вечер в плачи печалей и чаянии злых,/ но Твоим Боголепным кровом, Де́во, обоже́ни бывше,/ обретохом радость заутра:/ Ты бо спасла еси́ нас.
Припев: Пресвята́я Богоро́дице, спаси́ на́с.
Я́ко Боже́ственное прибежище покров Твой, Влады́чице, вси стяжавше к Бо́гу,/ в напастех и гонениях, и гресе́х к Тебе́ прибегаем/ и Тобо́ю изменение прие́млем, Пречистая.
Припев: Пресвята́я Богоро́дице, спаси́ на́с.
Грешников прибежище, низверженных исправление Ты еси́, Влады́чице:/ сего ради притекаю к покро́ву Твое́му,/ спаси́ мя, Богоневесто.
Припев: Пресвята́я Богоро́дице, спаси́ на́с.
В недоумении и печали сый и в беда́х, Пречистая,/ Тя призываю те́пле от се́рдца моего:/ предвари, и избави мя, и подаждь, Чи́стая, мне утеше́ние.
Сла́ва Отцу́ и Сы́ну и Свято́му Ду́ху.
Благословенная Де́во, Радосте скорбя́щих всех верных,/ от всякаго искушения и печали, и злобы завидящих мне изми/ и от грех и различных неду́г мя избави.
И ны́не и при́сно и во ве́ки веко́в. Ами́нь.
Вся еси́ светоносна, Свет незаходимый, Де́во, приемши и просвещающи, Чи́стая, верою Тебе́ вопиющия:/ Благословен, Пречистая, Плод Твоего́ чрева.

Песнь 8

Ирмос: На горе святей прославльшася/ и в купине́ огнем/ Присноде́вы Моисеови тайну явльшаго,/ Го́спода пойте/ и превозносите во вся ве́ки.
Припев: Пресвята́я Богоро́дице, спаси́ на́с.
Вся еси́ Чи́стая и Божественныя славы исполнена, Ближняя Моя,/ рече Дух Божий, Тя провозвещая, Пречистая./ Ю́же песньми воспеваем, поюще:/ тебе́ подоба́ет ра́доватися, Бо́га Человека рождшей.
Припев: Пресвята́я Богоро́дице, спаси́ на́с.
Ангелов похвало́ и человеков спасе́ние,/ и Спору́чница буди ми, Ма́ти Бо́жия:/ я́ко да обращу́ся и прииму разрешение прежде согрешенных в ве́дении и не в ведении.
Припев: Пресвята́я Богоро́дице, спаси́ на́с.
Тя по Бозе упование спасения в напастех иму́ще, ве́рнии, взываем:/ вся дела Господня, Го́спода пойте/ и превозносите Его́ во ве́ки.
Припев: Пресвята́я Богоро́дице, спаси́ на́с.
Приими́ песнь от худых усте́н, Де́во Всепетая, вопиющих Ти:/ ра́дуйся, болящим телесем врачевство́ и отчаянным душам спасе́ние.
Благослови́м Отца́ и Сы́на и Свята́го Ду́ха, Го́спода.
В болезнех и напастех одержимыя не пре́зри, Благая:/ но мольбу худую услышавши, свободи нас от скорбей великих,/ да верно Твою́ ми́лость и заступление, Чи́стая, воспеваем.
И ны́не и при́сно и во ве́ки веко́в. Ами́нь.
Стоящих утверждение еси́ и падших исправление, Де́во:/ те́мже мя, падшаго, возстави,/ да Тя сла́влю, Благословенную и Обрадованную.

Песнь 9

Ирмос: Благословен Господь Бог Израилев,/ воздвигнувый рог спасения нам/ в дому́ Давидове, Отрока Своего:/ в нихже посети нас Восток с высоты/ и направил ны есть на путь мира.
Припев: Пресвята́я Богоро́дице, спаси́ на́с.
Радости нам вечныя и жизни яви́лася еси́ преесте́ственне, Богородительнице, Хода́таица, Чи́стая,/ Спа́са всех рождшая, от лица земнаго вся́ку сле́зу я́ве отъемшаго и всем радость подавшаго.
Припев: Пресвята́я Богоро́дице, спаси́ на́с.
Радость и веселие, и радование Боже́ственное, Де́во Неискусомужная, нам умно́жися Божие:/ се бо, плачущиися лю́те, радуемся моли́твами Твоими.
Припев: Пресвята́я Богоро́дице, спаси́ на́с.
Под твое́ милосердие прибегающии верою избавляются скорбных бед жития́:/ те́мже и аз ко Твое́му покро́ву прибего́х, Богоро́дице.
Припев: Пресвята́я Богоро́дице, спаси́ на́с.
Псалмы Тя воспеваем, Благодатная,/ и немолчно, еже ра́дуйся, приносим:/ Ты бо источи́ла еси́ всем Радость.
Сла́ва Отцу́ и Сы́ну и Свято́му Ду́ху.
Иска́пающая Божественную сладость, всех Сладость рождшая,/ душу мою услади́, ядом змииным огорченную,/ отчуждающи мя горькаго вре́да всегда ходатайством Твоим,/ Предстательнице и радосте верных, Влады́чице.
И ны́не и при́сно и во ве́ки веко́в. Ами́нь.
Благословя́, благословлю́ Тя, Пречистая, и величаю те́пле:/ благослови мя убо, Твоего́ певца,/ и всяческих нуждных и печальных избави, и сохрани Твоими дланьми непобедима.

Светилен

Под кров Твой, Де́во Госпоже, прибегаем/ вси ро́ди человечестии:/ просвети́ ны светом Рождества Твоего́,/ грешныя рабы Твоя́,/ молящияся прилежно и покланяющияся Тебе́,/ и просящия умирения ми́рови/ и душам нашим ве́лия ми́лости.

Молитва Пресвятой Богородице пред иконой Ея «Всех скорбящих Радость»

О, Пресвята́я Влады́чице и Богоро́дице, Вы́сшая Херуви́м и Честне́йшая Серафи́м, Богоизбра́нная Отрокови́це, поги́бших Взыска́ние и всех скорбя́щих Ра́досте! Пода́ждь утеше́ние и нам, в поги́бели и ско́рби су́щим; ра́зве бо Тебе́ ино́го прибе́жища и по́мощи не и́мамы. Ты еди́на еси́ ра́дости на́шея Хода́таица, и я́ко Ма́терь Бо́жия и Ма́ти милосе́рдия, предстоя́щи у Престо́ла Пресвяты́я Тро́ицы, мо́жеши нам помощи́, никто́же бо притека́яй к Тебе́ посра́млен отхо́дит. Услы́ши у́бо и нас ны́не в день поги́бели и печа́ли пред Твое́ю ико́ною припа́дающих и со слеза́ми Тебе́ моля́щихся: отжени́ от нас належ́ащия на нас ско́рби и бе́ды в сей вре́менней жи́зни, не лише́ны же сотвори́ Твои́м всеси́льным хода́тайством и ве́чныя несконча́емая ра́дости в Ца́рствии Сы́на и Бо́га на́шего. Ами́нь.

Молитва 2-я Пресвятой Богородице пред иконой Ея «Всех скорбящих Радость»

О, Пресвята́я и Преблагослове́нная Де́во, Влады́чице Богоро́дице! При́зри ми́лостивным Твои́м о́ком на нас, предстоя́щих пред свято́ю ико́ною Твое́ю и со умиле́нием моля́щихся Тебе́; воздви́гни нас из глубины́ грехо́вныя, просвети́ ум наш, омраче́нный страстьми́, и уврачу́й я́звы душ и теле́с на́ших. Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице. Ты ве́си вся не́мощи и согреше́ния на́ша, к Тебе́ прибега́ем и вопие́м: не оста́ви нас Твое́ю Небе́сною по́мощию, но предста́ни нам при́сно и Твои́м неизрече́нным милосе́рдием и щедро́тами спаси́ и поми́луй нас, погиба́ющих. Да́руй нам исправле́ние грехо́вныя жи́зни на́шея и изба́ви нас от скорбе́й, бед и боле́зней, от внеза́пныя сме́рти, а́да и ве́чныя му́ки. Ты бо, Цари́це и Влады́чице, ско́рая Помо́щница и Засту́пница еси́ всем притека́ющим к Тебе́ и кре́пкое прибе́жище гре́шников ка́ющихся. Пода́ждь у́бо нам, Преблага́я и Всенепоро́чная Де́во, христиа́нский коне́ц жития́ на́шего ми́рен и непосты́ден и сподо́би нас Твои́м хода́тайством всели́тися в Оби́телях Небе́сных, иде́же непреста́нный глас пра́зднующих ра́достию сла́вит Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Молитва 3-я Пресвятой Богородице пред иконой Ея «Всех скорбящих Радость»

О, Влады́чице Преблагослове́нная, Защи́тнице ро́да христиа́нскаго, прибе́жище и спасе́ние прибега́ющих к Тебе́! Вем, вои́стинну вем, я́ко зело́ согреши́х и прогне́вах, Преми́лостивая Госпоже́, рожде́ннаго пло́тию от Тебе́ Сы́на Бо́жия. Но и́мам мно́гия о́бразы пре́жде мене́ прогне́вавших Его́ милосе́рдие: мытари́, блудни́цы и про́чия гре́шники, и́мже даде́ся проще́ние грехо́в их покая́ния ра́ди и испове́дания. Ты́я у́бо о́бразы поми́лованных очесе́м гре́шныя души́ моея́ представля́я и на толи́кое Бо́жие милосе́рдие, о́ныя прие́мшее, взира́я, дерзну́х и аз гре́шный прибе́гну с покая́нием ко Твоему́ благосе́рдию. О, Всеми́лостивая Влады́чице! Пода́ждь ми ру́ку по́мощи и испроси́ у Сы́на Твоего́ и Бо́га ма́терними и святе́йшими Твои́ми моли́твами тя́жким мои́м грехо́м проще́ние. Ве́рую и испове́дую, я́ко Той, Его́же родила́ еси́, Сын Тво́й есть вои́стинну Христо́с, Сын Бо́га жива́го, Судия́ живы́х и ме́ртвых, воздая́й коему́ждо по дело́м его́; ве́рую же па́ки и испове́дую Тебе́ бы́ти и́стинную Богоро́дицу, милосе́рдия исто́чник, утеше́ние пла́чущих, взыска́ние поги́бших, си́льную и непрестаю́щую к Бо́гу хода́таицу, зело́ лю́бящую род христиа́нский, и спору́чницу покая́ния; вои́стинну бо несть нам ины́я по́мощи и покро́ва, ра́зве Тебе́, Госпоже́ Преми́лостивая, и никто́же, упова́я на Тя, постыде́ся когда́, и Тобо́ю умоля́я Бо́га, никто́же оста́влен бысть. Того́ ра́ди и аз Твою́ неисче́тную бла́гость молю́: отве́рзи две́ри милосе́рдия Твоего́ мне заблу́ждшему и па́дшему в тиме́ние глубины́, не возгнуша́йся мене́ скве́рнаго, не пре́зри гре́шнаго моле́ния моего́, не оста́ви мене́ окая́ннаго, я́ко в поги́бель зло́бный враг похи́тити мя и́щет, но умоли́ о мне рожде́ннаго от Тебе́ милосе́рдаго Сы́на Твоего́ и Бо́га, да прости́т вели́кия моя́ грехи́ и изба́вит мя от па́губы моея́, я́ко да и аз, со все́ми получи́вшими проще́ние, воспою́ и просла́влю безме́рное милосе́рдие Бо́жие и Твое́ непосты́дное о мне заступле́ние в жи́зни сей и в несконча́емом ве́це. Ами́нь.

Молитва 4-я Пресвятой Богородице пред иконой Ея «Всех скорбящих Радость»

Цари́це моя́ преблага́я, Наде́ждо моя́, Богоро́дице, Прия́телище си́рым и стра́нным Предста́тельнице! Скорбя́щим Ра́досте, оби́димым Покрови́тельнице! Зри́ши мою́ беду́, зри́ши мою́ скорбь: помози́ ми я́ко не́мощну, окорми́ мя я́ко стра́нна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я Предста́тельницы ни благи́я Уте́шительницы то́кмо Тебе́, о Богома́ти, я́ко да сохрани́ши мя и покры́еши во ве́ки веко́в. Ами́нь.

Молитва 5-я Пресвятой Богородице пред иконой Ея «Всех скорбящих Радость»

Засту́пнице Усе́рдная, Благоутро́бная Го́спода Ма́ти, к Тебе́ прибега́ю аз, окая́нный и па́че всех челове́к грешне́йший; вонми́ гла́су моле́ния моего́, вопль мой и стена́ние услы́ши. Я́ко беззако́ния моя́ превзыдо́ша главу́ мою́, и аз, я́коже кора́бль в пучи́не, погружа́юся в мо́ре грехо́в мои́х. Но Ты, Всеблага́я и Милосе́рдная Влады́чице, не пре́зри мене́, отча́яннаго и во гресе́х погиба́ющаго; поми́луй мя, ка́ющагося в злых де́лех мои́х, и обрати́ на путь пра́вый заблу́дшую окая́нную ду́шу мою́. На Тебе́, Влады́чице моя́, Богоро́дице, возлага́ю все упова́ние мое́. Ты, Ма́ти Бо́жия, сохрани́ и соблюди́ мя под кро́вом Твои́м, ны́не и при́сно и во ве́ки веко́в. Ами́нь.