Акафист священномученику Петру, архиепископу Воронежскому, новомученику Соловецкому

Текст акафиста одобрен для употребления за богослужением и в домашней молитве на заседании Священного Синода 27 декабря 2023 года (журнал № 131).

Кондак 1

Избра́нный святи́телю Госпо́день, испове́дниче и му́чениче Христо́в, ве́рою и любо́вию до конца́ Влады́це твоему́ послужи́вый, по́двиги мно́ги соверши́вый, страда́ния ве́лия за Христа́ мýжественне претерпе́вый, ли́ку Небе́cному страстотéрпцев Це́ркве Ру́сския благоче́стно причте́нный, заступа́й нас моли́твами твои́ми, досточýдне, да велегла́сно вопиéм ти: Ра́дуйся, священному́чениче Пе́тре, ве́ры правосла́вныя утвержде́ние.

Икос 1

А́нгельски от ми́ра мяте́жнаго к высоте́ Небе́cней умо́м и се́рдцем восходи́л еси́, священному́чениче Пе́тре, херуви́мски созерца́я бéздну милоcе́рдия Бо́жия, серафи́мскою любо́вию пыла́я ко своему́ Созда́телю, прославля́л еси́ Того́ глаго́лы вдохновéнными. Те́мже и от нас приими́ благода́рныя любве́ воздая́ния, да ра́достным се́рдцем и умилéнною душéю воспева́ем ти:
Ра́дуйся, пла́менем любве́ боже́cтвенныя от ю́ности возжжéнный;
ра́дуйся, мно́гими доброде́тельми от мла́дости украшéнный.
Ра́дуйся, о́трасле до́брая ко́рене благочести́ваго;
ра́дуйся, сы́не сла́вный Отéчества многотерпели́ваго.
Ра́дуйся, любо́вию Христо́вою неотсту́пно назира́емый;
ра́дуйся, во благонра́вии то́ю мýдре соблюда́емый.
Ра́дуйся, во́лею Госпо́днею на пýть свящéннаго служéния наста́вленный;
ра́дуйся, десни́цею Вы́шняго в Ца́рствие Небе́cное упра́вленный.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 2

Ви́дя Госпо́дь вéлию ве́ру и усéрдие твое́ к Нему́, я́ко измла́да прилежа́л еси́ боже́cтвенней слу́жбе и вся́кому благочéстию, о́бразом А́нгельским и са́ном свяще́нным почти́ тя, и на служéние Свое́ поста́ви. Ты же по́двиг сeй до́блественне соверша́л еси́, вы́ну воспева́я благода́телю Бо́гу: Аллилу́иа.

Икос 2

Ра́зумом богопросве́щeнным в позна́нии И́стины преуспева́л еси́, достоблажéнне Пе́тре, му́дростию духо́вною обогаща́яся, кре́пости Боже́cтвенныя исполня́яся, доброде́тели ева́нгельския невозвра́тно души́ своéй усвоя́я. Те́мже мы, покланя́ющеся милоcе́рдному Бо́гу, такова́ ди́вна сокро́вища тебе́ дарова́вшему, во умилéнии глаго́лем ти:
Ра́дуйся, благода́тию Бо́жиею освящéнный;
ра́дуйся, прему́дрости Им всещéдро научéнный.
Ра́дуйся, ра́зум свят смирéнием стяжа́вый;
ра́дуйся, да́нныя ти Го́сподем тала́нты стокра́тно умножа́вый.
Ра́дуйся, ко А́нгельскому чи́ну от ю́ности причтéнный;
ра́дуйся, и́менем апо́стола Петра́ во и́ночестве наречéнный.
Ра́дуйся, подвиго́м о́наго о Го́споде поревнова́вый;
ра́дуйся, ско́рбный и сла́достный путь страда́ний о Христе́ избра́вый.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 3

Си́ле духо́вней, в тебе́ су́щей, диви́шася лю́дие, па́стыря до́браго и милосéрдаго уте́шителя душ скорбя́щих тя обре́тше; любо́вию бо твоéю согрева́еми, к тебе со благодарéнием притека́ху, ра́достию воспева́юще Бо́гу: Алли́луиа.

Икос 3

Име́я сéрдце, вéлия ве́ры ко Го́споду испо́лненное и словéс боже́cтвенных трепéщущее, досто́ин яви́лся еси́, о́тче Пе́тре, са́на архиерéйскаго, во́ньже и возведé тя сердцеве́дец Бог, вла́стию и благода́тию святи́тельскою облека́я тя. Те́мже прославля́юще я́же от Бога доброде́тели и дарова́ния твоя́, поéм ти такова́я:
Ра́дуйся, зо́ву Боже́cтвеннаго Учи́теля ра́достне повинова́выйся;
ра́дуйся, о сла́ве Его Небе́cней ду́хом возгора́выйся.
Ра́дуйся, ко служéнию святи́тельскому ду́шу свою́ угото́вивый;
ра́дуйся, апо́столу первоверхо́вному рéвностию по Бо́зе себе́ уподо́бивый.
Ра́дуйся, сла́дость словéс Госпо́дних в се́рдце всегда́ храни́вый;
ра́дуйся, и́гу благо́му Христо́ву вы́ю свою́ подклони́вый.
Ра́дуйся, благода́ть архипа́стырскую от руку́ Первосвяти́теля Ти́хона приéмый;
ра́дуйся, я́коже и той, по́двиг испове́дничества и му́ченичества подъéмый.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 4

Бу́ря беззако́ний поколеба́ держа́ву Росси́йскую в годи́ну испыта́ний лю́тых, за грехи́ от Бо́га попу́щенных; я́рость и уны́ние, скорбь и рыда́ние испо́лниша многострада́льное Отéчество на́ше. Тобо́ю же, святи́телю, и тебе́ единонра́вными Це́рковь Ру́сская не сокруши́ма от врат а́довых сохрани́ся. Лю́дие же, ви́дяще непоколеби́му ве́ру твою́, и свети́льник доброде́телей твои́х при́сно горя́щ, воспева́ху Бо́гу: Аллилу́иа.

Икос 4

Слы́шав глас Бо́жий в се́рдцы твоéм, ко испове́данию И́стины и попече́нию о па́стве Христо́вой призыва́ющий, слуга́ Госпо́день ве́рен и безстра́шен яви́лся еси́; гонéний и прещéний вра́жиих не убоя́вся, служéние святи́тельское и па́стырское до конца́ дней ре́вностно соверша́л еси́, достоблажéнне Пе́тре. Те́мже, дивя́щеся вели́чию души́ твоея́, во умилéнии глаго́лем ти:
Ра́дуйся, о́гненный сто́лпе, во мра́це безбо́жия све́тло сия́яй;
ра́дуйся, ка́меню ве́ры Христо́вы, лю́ди во благоче́стии утвержда́яй.
Ра́дуйся, от разделе́ния и расхищéния па́ству свою́ храни́вый;
ра́дуйся, во́лны мятéжа церко́внаго си́лою Бо́жиею укроти́вый.
Ра́дуйся, к слу́жбе боже́cтвенней ве́лию рéвность име́вый;
радуйся, ни еди́но от слове́с Госпо́дних презре́вый.
Ра́дуйся, уста́ва церко́внаго стро́гий блюсти́телю;
ра́дуйся, Бо́жиих дел ми́лостивый соверши́телю.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 5

Богоизбра́нный во́ине Христо́в, священному́чениче Пе́тре, ору́жием ве́ры и о́гненным мечéм словéс боже́cтвенных посека́л еси́ вся́кое нечéстие, разруша́л еси́ ко́зни вра́жия, еди́нство церко́вное от наве́тов сохраня́я. Бо́гу же, споспешеству́ющу ти и на по́двиг вдохновля́ющу, воспева́л еси́ вы́ну: Аллилу́иа.

Икос 5

Ви́девше врази́ ро́да христиа́нскаго тя и́стинна побо́рника ве́ры оте́ц на́ших и Це́ркве Правосла́вныя защи́тителя, скорбьми́ и па́костьми лю́те уязвля́ху тя, погуби́ти тща́щеся. Ты же, яко святы́й Па́вел, и во у́зах сый, благовествова́ния о Христе́ ника́коже оста́вил еси́, ду́ши во спаcе́ние уловля́я. Сего́ ра́ди песносло́вим ве́лия труды́ твоя́, любо́вию Христо́вою соверша́емыя, и прино́сим ти хвале́ния сицева́я:
Ра́дуйся, мно́ги ско́рби, заточéние и изгна́ние претерпе́вый;
ра́дуйся, жи́зни врéменныя сла́дость пра́вды ра́ди Бо́жия презре́вый.
Ра́дуйся, и́стинную ра́дость во страда́ниих о Го́споде обрета́вый;
ра́дуйся, си́ми страда́нии в по́двизе любве́ Христо́вы возраста́вый.
Ра́дуйся, во у́зах стра́ждущим отра́да и утеше́ние бы́вый;
ра́дуйся, о́браз терпе́ния и себе́ отверже́ния до́блественне яви́вый.
Ра́дуйся, сокро́вища се́рдца твоеѓо лю́дем ще́дро откры́вый;
ра́дуйся, си́лою любве́ твоея́ мно́ги отпа́дшия ко Христу́ обрати́вый.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 6

Пропове́дует Це́рковь Ру́сская вели́чие доброде́телей и подвиго́в твои́х, святи́телю о́тче Пе́тре. Неуста́нною бо моли́твою и ре́вностию о слу́жбе Бо́жией, и о́бщаго усе́рднаго моле́ния устрое́нием, утеша́л еси́ ве́рныя в годи́ну безбо́жную. Те́мже и мы да́ры любве́ своея́ благода́рне тебе́ прино́сим, Бо́гу же, дарова́вшему нам па́стыря преди́внаго, пое́м: Аллилу́иа.

Икос 6

Возсия́ земли́ Ру́сстей сла́ва по́двига му́ченическаго и святи́тельскаго твоего́, и́стинный служи́телю Христо́в, свяще́нне Пе́тре: иде́же бо а́ще тружда́лся еси́ на ни́ве церко́вней, всю́ду чу́дная дела́ соверша́л еси́, в ча́дех духо́вных до́брую па́мять о тебе́ и серде́чную любо́вь оставля́я. Сего́ ра́ди, благодаря́ще о тебе́ Бо́га, со умиле́нием глаго́лем ти:
Ра́дуйся, пра́вило ве́ры и благочéстия о́бразе всесовершéнный;
ра́дуйся, пла́меню, благода́тию Боже́cтвеннаго Ду́ха возжжéнный.
Ра́дуйся, в зе́млю Нижегоро́дскую на служе́ние апо́стольское призва́нный;
ра́дуйся, в кра́е Тверсте́м гони́телями от па́ствы твоея́ отлуче́нный.
Ра́дуйся, ре́вности святи́теля Воро́нежского Митрофа́на подража́телю;
ра́дуйся, благове́стия Задо́нскаго чудотво́рца Ти́хона продолжа́телю.
Ра́дуйся, смире́ния святи́теля Анто́ния приле́жный после́дователю;
ра́дуйся, Це́ркве Воро́нежския до́брый благоустрои́телю.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 7

Хотя́ сохрани́ти Церковь Русскую от раско́ла и ересе́й, и изба́вити от отча́яния лю́ди, в заблужде́ния поги́бельная и озлобле́ние впа́дшия, труды́ ве́лия поне́сл еси́, прему́дре Пе́тре, непреста́нно де́лы и словесы́ Христа́ пропове́дуя, в преде́лех Тверски́х, Нижегоро́дских и Воро́нежских. Сего́ ра́ди мно́зи неве́рнии, слы́шавше тя, к Бо́гу и́стинному обрати́шася и воспе́ша Ему́ ра́достию: Аллилу́иа.

Икос 7

Но́ваго тя испове́дника и му́ченика Христо́ва яви́ ми́ру многострада́льная Це́рковь Ру́сская, ра́нами безчи́сленными изъя́звлeнная, кро́вию му́ченическою оби́льно напоéнная, сла́вою мно́жества святы́х свои́х увенча́нная. Те́мже и мы, почита́юще тя я́ко еди́наго от сих досто́йнейших и сла́внейших сыно́в росси́йских, пе́ние хвалéбное прино́сим ти:
Ра́дуйся, святи́телю, Христа́ безстра́шно исповедавый;
ра́дуйся, стра́ха челове́ческа и боя́зни от убива́ющих те́ло не ве́давый.
Ра́дуйся, па́стырю, ду́шу за о́вцы твоя полага́вый;
ра́дуйся, наéмником лука́вым па́ствы твоея́ расхи́тити не да́вый.
Ра́дуйся, святы́ню Це́ркве Правосла́вныя рéвностно храни́вый;
ра́дуйся, враго́в ея́ тем в трéпет приводи́вый.
Ра́дуйся, к кончи́не жития́ твоего́ му́ченичестей всеце́ло угото́вивыйся;
ра́дуйся, во смире́нии, ми́ре и кро́тости прия́ти ту сподо́бивыйся.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 8

Стра́нен на земли́ пребы́л еси́, священнострада́льче, не имы́й приста́нища во отéчествии твоéм, от враг Христо́вых, не терпя́щих свя́тости твоея́, гони́мый и поноша́емый, оба́че не убоя́лся еси противуста́ти власте́м безбо́жным, деяньми лжепа́стырей Це́рковь Святу́ю разори́ти тща́щимся. Сего́ ра́ди словесы́ богому́дрыми мно́гия мирски́я и пресви́теры, в раско́лы отпа́дшия, ко Христу́ обрати́л еси́ и чрез покая́ние и́стинное в ло́но Церко́вное возврати́л еси́, да и ти́и сла́вят еди́наго И́стиннаго Бо́га, сéрдцем и усты́ поя́ небе́cную песнь: Аллилу́иа.

Икос 8

Всего́ себе́ во́ли Госпо́дни преда́в, страда́ния Его́ ра́ди за чeсть почита́л еси́, досточу́дне. Те́мже в темни́цех заточéние и во ото́ки Соловéцкия, ме́стом муче́ний безбо́жники соде́ланныя, преселéние я́ко от десни́цы Бо́жия восприя́л еси́. Мы же, чту́ще му́жество и долготерпе́ние твое, хвале́ния прино́сим ти такова́я:
Ра́дуйся, во святы́я ото́ки Солове́цкия на страда́ния и рабо́ты тя́жкия изгна́нный;
ра́дуйся, та́мо стра́ждущим во утешéние и утверждéние в Бо́зе дарова́нный.
Ра́дуйся, ко мно́жеству архиерéев и свяще́нник, та́мо заключе́нных, причтéнный;
ра́дуйся, священному́чениче чу́дный и страстотéрпче совершéнный.
Ра́дуйся, и во у́зах досто́йный образ архипа́стыря храни́вый;
ра́дуйся, си́лою духо́вною и мучи́телей безбо́жных покори́вый.
Ра́дуйся, боже́cтвенную тишину́ и мир глубо́к в души́ име́вый;
ра́дуйся, страда́ния кре́стная, от Го́спода по́сланная, любо́вию претерпе́вый.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 9

Вся́кое А́нгельское естество́ удиви́ся чу́дным подвиго́м твои́м, Богоблажéнне, ты бо я́ко еди́н от ору́жник небе́cных, до́блественне во́инствовал еси́ на ду́хи зло́бы за Влады́ку твоего́ Христа́, воспева́я Тому́ с ли́ки безпло́тных: Аллилу́иа.

Икос 9

Вети́и суему́дреннии не мо́гут разуме́ти высоты́ доброде́телей твои́х и глубины́ боже́cтвенныя твоея́ любве́: тоя́ бо ра́ди мно́гая страда́ния благоду́шно претерпе́л еси́, во е́же от Го́спода ти неразлучéну бы́ти. Сию́ же и на вся́каго челове́ка излива́л еси́, «Вся люблю́ и о всех скорблю́», глаго́ля. Мы же, чту́щии свя́тость души́ твоея́ и си́лу духо́вную, Бо́гом ти дарова́нную, во умилéнии глаго́лем:
Ра́дуйся, томле́ния и труды́ тя́жкия в заточéнии терпе́вый;
ра́дуйся, о осквернéнии земли́ Ру́сския и Соловéцкия оби́тели скорбе́вый.
Ра́дуйся, утешéние души́ в моли́тве обрета́вый;
ра́дуйся, боже́cтвенную слу́жбу со свящéнными соу́зники твои́ми неотсту́пно соверша́вый.
Ра́дуйся, за всю страну́ Росси́йскую благоприя́тну жéртву Боѓу приноси́вый;
ра́дуйся, о покая́нии ея́ в серде́чнем сокрушéнии Го́спода моли́вый.
Ра́дуйся, служи́телю Христо́вы Це́ркве и моли́твенниче самоотвержéнный;
ра́дуйся, архиепи́скоп Соловéцкий соу́зники твои́ми наречéнный.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 10

Спаcти́ хотя́ ду́шу твою́, Богому́дре, смирéние кре́стное вку́пе со ины́ми доброде́тельми Го́споду принéсл еси́, уничижа́ющим и гоня́щим тя николи́же противля́яся; приста́нище после́днее земна́го жития́ твоего́ во ото́це А́нзерстем обре́л еси́, а́може приведé тя Человеколю́бец Бог, на высоту крайнюю подвига мученическаго возводя. Ты же благопо́корне восприя́л еси о́ный, любо́вию воспева́я Го́сподеви: Аллилу́иа.

Икос 10

Сте́ну необори́му име́л еси́ благода́ть Госпо́дню, благи́й о́тче, защища́ющу тя от враг неви́димых, не могу́щих души́ твоея́ погуби́ти; досто́ин бо тоя́ благода́ти яви́лся еси́ богоуго́дными труды́ твои́ми и умиле́нными моли́твами, и́миже умно́жил еси́ сла́ву сего́ ди́внаго ото́ка. Се́го ра́ди покланя́ющеся Всеми́лоcтивому Богу, воспева́ем тя́, еди́наго от избра́нных Его, хвале́нии таковы́ми:
Ра́дуйся, в безмо́лвии ото́ка Анзерскаго а́ки пустынник поживый;
ра́дуйся, святы́ню му́ченичества твоего́ к сокро́вищем богоизбра́ннаго ото́ка приложи́вый.
Ра́дуйся, в ме́сте подвиго́в пустыннолю́бнаго Елеаза́ра и любобезмо́лвнаго Ио́ва пребыва́вый;
ра́дуйся, к та́йном сокрове́нным их а́нгельскаго жи́тельства ду́хом приника́вый.
Ра́дуйся, преподо́бному Ге́рману, первонача́льнику Соловéцкому, незри́мо бесе́довати сподо́бивыйся;
ра́дуйся, Вы́шним изволéнием стихосло́вие ака́фистное соста́вити тому́ удосто́ивыйся.
Ра́дуйся, к по́мощи святы́х сея́ сла́вныя земли́ во страда́ниих твои́х прибега́вый;
ра́дуйся, святу́ю па́мять твою́ со ото́ки Соловéцкими наве́ки связавый.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 11

Пе́ние всеумилéнное благода́рною душéю возно́сим ти, всесвяты́й Влады́ко, Архиерéю Небе́cный, я́ко дарова́л еси нам сего́ ди́внаго па́стыря, свята́го Петра́, на утешéние и спаcе́ние душа́м наши́м и укрепле́ние в вере́ Христовой людей русских. Того́ по́двиги песносло́вяще, тебе́ Бо́гу на́шему сла́ву возсыла́ем пе́нием хвалéбным: Аллилу́ия.

Икос 11

Светоно́сен свети́льник во тьме́ безу́мия и мра́це беззако́ния горя́й, вся озаря́л еси сия́нием боже́cтвенныя благода́ти, просвеща́я ду́ши све́том и́стиннаго ра́зума. И до ото́ков се́верных дости́же свет боголюби́выя души́ твоея́, да́же до безмо́лвныя А́нзерския пу́стыни, иде́же ты во святе́й горе́ Голго́фе, по́двиги и́ноческими просла́вленней, му́ченически сконча́л еси́ многотру́дное житие́ твое́. Сего́ ра́ди воспева́ем долготерпе́ние твое́, о́тче пра́ведне, и любо́вию умилéнно взыва́ем:
Ра́дуйся, в после́дния дни жития́ твое́го, лю́те неду́гуя, сла́дость вы́шняго ми́ра па́че позна́вый;
Ра́дуйся, всем се́рдцем твои́м возлюби́вый Христа́, и вся до конца́ за Того́ претерпе́вый;
Ра́дуйся, на горе́ Голго́фе а́нзерстей в ру́це Бо́жии ду́шу преда́вый;
ра́дуйся, му́ченичеством свои́м в свящéннем селéнии сем просия́вый.
Ра́дуйся, безпреткновéнно во оби́тели го́рния душéю возлете́вый.
ра́дуйся, чу́дным житиéм твои́м и кончи́ною пра́ведною Бо́га просла́вивый.
Ра́дуйся, ди́вная зна́мения и чудеса́ по кончи́не твоéй ми́лостивно яви́вый;
ра́дуйся, мо́щи честны́я твоя́ и свящéнную па́мять тво́ю на земли́ нам оста́вивый.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 12

Благода́ти, су́щей в тебе́, дивя́щеся, велича́ем тя, святи́телю приснопа́мятный Пе́тре. Ве́руем, я́ко дела́ Бо́жия на земли́ соверши́в, и страда́ния ве́лия претерпе́в, ны́не с Го́сподем во оби́телех Его́ почива́еши, призира́я на нас с высоты́ небе́cныя, и приклоня́я к нам вы́шнее милоcе́рдие. На твое́ заступлéние наде́ющеся и на благода́тную по́мощь твою́ упова́юще, поéм ди́вному во святы́х Свои́х Бо́гу: Аллилу́иа.

Икос 12

Пою́ще Богоуго́дное житие́ твое́, благодея́ний испо́лнено, достохва́льне Пе́тре, и кончи́ну твою́ му́ченическую прославля́юще, благода́рным се́рдцем, любо́вию боже́cтвенною дви́жимым, ублажа́ем тя, и па́мять твою́ све́тло пра́зднующе, ра́достию зовéм ти:
Ра́дуйся, свя́тче, в та́йны боже́cтвенныя посвящéнный;
радуйся, сы́не Ца́рствия Небе́cнаго благословéнный.
Ра́дуйся, свети́льниче, в после́дняя времена́ нам Бо́гом дарова́нный;
ра́дуйся, предста́телю о многострада́льней стране́ Росси́йстей, Го́сподем избра́нный.
Ра́дуйся, Це́ркве правосла́вныя благоукрашéнный ве́нче;
ра́дуйся, Христо́в преди́вный испове́дниче и страстотéрпче.
Ра́дуйся, о́браз страда́ния и любве́ ко Го́споду нам явля́яй;
ра́дуйся, на у́зкий пу́ть спасéния нас наставля́яй.
Ра́дуйся, священному́чениче Пе́тре, ве́ры правосла́вныя утвержде́ние.

Кондак 13

О пресла́вный и пречу́дный уго́дниче Христо́в, святы́й священному́чениче Пе́тре! Приими́ от нас, недосто́йных и гре́шных, сие́ ма́лое молéние на́ше, благогове́йно тебе́ приноси́мое. Испроси́ у Всеми́лоcтиваго Влады́ки твоего́ Христа́, Ему́же ны́не со дерзновéнием предстои́ши, прощéния и оставлéния мно́гим грехо́м на́шим, напра́ви нас ко стези́ покаяния, да тем изба́вльшеся лю́тых страстéй, изба́вимся и мук ве́чных, и в ра́дости неизглаго́ланней Ца́рства Небе́cнаго воспои́м с тобо́ю Христу́ Бо́гу: Аллилу́иа, Аллилу́иа, Аллилу́иа.
[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Кондак 1

Молитва 1-я

О, досточу́дне Пе́тре, священному́чениче сла́вный, еди́н от со́нма новому́чеников Солове́цких и всея́ земли́ Ру́сския, гра́ду Воро́нежу похвало́, па́стырю ди́вный ста́да Христо́ва, ве́рный служи́телю Бо́жий, защи́тителю ре́вностный Це́ркве Правосла́вныя!
Все житие́ твое́ любве́ ко Го́споду и страда́ний о Христе́ испо́лнено бы́сть, ты бо, мно́гая муче́ния, боле́зни и ско́рби, изгна́ния и заточе́ния Его́ ра́ди претерпе́в, испове́дник безстра́шен яви́лся еси́ и венце́м нетле́нныя твоея́ сла́вы Це́рковь Ру́сскую укра́сил еси́. Вся преда́в в ру́це Бо́жии, до́блественне служе́ние твое́ на земли́ соверши́л еси́ и на Голго́фе А́нзерстей кончи́ну му́ченическую прия́ти сподо́бился еси́, богоблаже́нне. Ны́не к Небе́сному ли́ку причте́нный, и вене́ц му́ченический за Христа́ прие́мый, со мно́гими жи́тели Го́рняго Иерусали́ма в Ца́рстве Боже́ственныя любве́ пребыва́еши.
О, блаже́нне о́тче наш Пе́тре, помози́ нам хра́мину се́рдца своего́ незапусте́вшу храни́ти, научи́ нас ра́дость во страда́ниих о Христе́ обрета́ти, озари́ пу́ть наш кре́стный сия́нием твоея́ святы́ни. Бу́ди и ны́не нам утвержде́ние в ве́ре, да, прише́д, обря́щет ю Госпо́дь не уга́снувшу в сердца́х на́ших. Умоли́ Творца́ вся́ческих дарова́ти нам си́лу и кре́пость, да не устраши́вшеся стра́ха лука́ваго, испове́даем тве́рдо Христа́ Спа́са на́шего и Его́ милосе́рдием ча́сти злых да изба́вимся в де́нь стра́шный воздая́ния, и в ра́дость ве́чную всели́мся, сла́вяще о все́м Вседержи́теля Бо́га, и твое́ благода́тное к Не́му о нас предста́тельство во ве́ки веко́в. Ами́нь.

Молитва 2-я

О, свяще́нная и многострада́льная главо́, земны́й а́нгеле и Небе́сный челове́че, священному́чениче и чудотво́рче Пе́тре, архиере́ю Бо́жий! Ты в годи́ну лю́тых гоне́ний яви́лся еси́ я́ко церко́вное свети́ло и и́стинныя ве́ры утвержде́ние, зане́ пред богобо́рцы дерзнове́нно Хри́ста испове́дал еси́, и я́ко кади́ло благово́нное, в же́ртву Бо́гу себе́ прине́сл еси́.
Яви́ нам, смире́нным и гре́шным, ко святы́м моще́м твои́м притека́ющим, многомо́щное твое́ заступле́ние, и вку́пе со все́ми святы́ми, во ото́цех Солове́цких просия́вшими, испроси́ у Го́спода вся́кий дар, коему́ждо благопотре́бен ко спасе́нию. Се бо грех на́ших ра́ди не и́мамы дерзнове́ния ко Го́споду и Влады́це на́шему, и пра́ведный гнев Его́ на ся наведо́хом, и вся́кия ми́лости Его́ недосто́йны себе́ сотвори́хомся. Те́мже, не сме́юще возвести́ очеса́ на́ша к высоте́ Небе́сней, ниже́ моле́бный глас ко Го́споду, се́рдцем сокруше́нным и смире́нным ду́хом тебе́ моли́твенника благоприя́тнаго к Нему́ предлага́ем, и про́сим тя со усе́рдием ве́лиим: бу́ди засту́пник и хода́тай наш пред Бо́гом, Судие́ю Пра́веднейшим, се бо вы́ну прогневля́ем Его́ согреше́нии мно́гими. Ны́не у́бо, во сла́ве Небе́сней пребыва́я и с ли́ки святы́х непреста́нно славосло́вя Пресвято́е И́мя Го́спода, при́зри на на́с, гре́шных, и изба́ви всех, ве́рою несумне́нною к Бо́гу приходя́щих, от вся́ких бед, наве́тов и прило́гов диа́вольских. Укроти́ во́лны страсте́й и искуше́ний, востаю́щих на ны, да ра́ди святы́х твои́х моли́тв не обы́мет нас напа́сть, и не поги́бнем в пучи́не грехо́вней и в ти́не страсте́й на́ших.
Вознеси́, богоно́сне о́тче наш, сие́ ма́лое моле́ние недосто́йных раб твои́х Влады́це Христу́, да утверди́т зе́млю на́шу в пра́вой ве́ре и благоче́стии, Це́рковь Святу́ю да сохрани́т непреобори́му от ересе́й и раско́лов, и соблюде́т невреди́му от вся́каго зла́. Испроси́ у великодарови́таго Христа́ Бо́га на́шего скорбя́щим утеше́ние, неду́гующим исцеле́ние, оби́димым заступле́ние, па́дшим во грехи́ покая́ние и воста́ние, стра́ждущим от бе́сов ско́рое свобожде́ние, от Це́ркве Христо́вы отпа́дшим вразумле́ние и на пу́ть спасе́ния обраще́ние. Ты му́ченически ду́шу твою́ за ве́ру положи́л еси́, да́руй и нам му́жество подража́ти тебе́, да ничто́же в жи́зни сей вре́менней возмо́жет отлучи́ти ны от любве́ Божия.
О, святи́телю Христо́в, огради́ и укрепи́ моли́твами твои́ми град сей, да процвете́т в нем ре́вность ко спасе́нию и благоче́стие. Ты, непреста́нно о ча́се сме́ртнем па́мять име́вый и благу́ю ча́сть избра́нных Бо́жиих от Го́спода получи́вый, сподо́би и нас в ми́ре и покая́нии живо́т свой сконча́ти, и Ца́рствия Бо́жия насле́дники бы́ти, иде́же ты водворя́ешися со а́нгелы и все́ми святы́ми, хваля́ Бо́га в Тро́ице сла́вимаго, О́тца и Сы́на и Свята́го Ду́ха, во ве́ки веко́в. Ами́нь.