Акафист святому преподобному Матфею Яранскому

Конда́к 1, глас 8

Избра́нный от Го́спода и Богоро́дицы ди́вный служи́телю, преподо́бне о́тче наш Матфéе, име́яй вéлие дерзновéние ко Отцу́ cве́тов, моли́ся о всех к тебе́ в нýждах и напа́стех притека́ющих и на́с гре́шных от всех бед и искушéний изба́ви, зовýщих ти:
Ра́дуйся, преподо́бне о́тче наш Матфе́е, Яра́нский чудотво́рче.

И́кос 1

Ангелоподо́бное житие́ возлюби́л еси́, о́тче Матфéе, от преподо́бнаго Стефа́на приéм благоcловéние на пострижéние и́ноческое, свя́то и Богоуго́дно пожи́л еси́, в посте́, бде́нии и моли́тве непреста́нно пребыва́я. Мы же, зря́ще ве́лия и прехва́льныя труды́ твоя́ и благодаря́ще Бо́га, дарова́вшаго земли́ Вя́тстей такова́го свети́льника ве́ры и благоче́стия, воспева́ем тебе́ си́це:
Ра́дуйся, бде́нием, посто́м и моли́твою с Го́сподем соедини́выйся;
ра́дуйся, подви́жниче Бо́жий, ми́ра красота́ми не прельсти́выйся.
Ра́дуйся, Кре́ст Госпо́день носи́ти усéрдно возжела́вый;
ра́дуйся, моли́твы кади́ло благово́нное.
Ра́дуйся, исто́чниче любве́ неизсяка́емый;
ра́дуйся, свети́льниче я́ркий, Го́сподем на све́щнице поста́вленный.
Ра́дуйся, ми́лоcть от Го́спода получи́вый;
ра́дуйся, жи́зни ве́чныя сподо́бивыйся.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 2

По про́мыслу Бо́жию притéкл еси́ ко преподо́бному Стефа́ну научи́тися зако́ну Госпо́дню, в нéмже преуспева́я, от си́лы в си́лу восходя́, под и́го Христо́во смирéнно вы́ю преклони́л еси́, поя́ Бо́гу: Аллилýиа.

И́кос 2

Ви́дя прилежа́ние твое́ в постижéнии та́ин Госпо́дних и усéрдие в служéнии Бо́гу и лю́дем, со умилéнием в сердца́х на́ших ра́достно вопиéм ти:
Ра́дуйся, от ста́рца пла́менную любо́вь к Бо́гу в сéрдце приéмый;
ра́дуйся, учи́телю благочéстия, о́бразом жития́ твоего́ всех поуча́вый.
Ра́дуйся, о лю́дех и спасéнии их моли́твенниче усéрдный;
ра́дуйся, и́ночества Богоуго́днаго пра́вило изве́стное.
Ра́дуйся, мир и чиcтоту́ в сéрдце своéм водвори́вый;
ра́дуйся, дýшу свою еди́ному Бо́гу вручи́вый.
Ра́дуйся, цве́те благово́нный, Бо́гом насаждéнный;
ра́дуйся, на спасéние ду́ш на́м явлéнный.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 3

Ве́дая заве́т Христо́в: «И́же хо́щет по мне ити́, да отвéржется себе́, и во́змет крест свой, и по Мне грядéт», и рéвностно его́ исполня́я, мир отвéргл еси́ и за Го́сподем после́довал еси́, и получи́в награ́ду вéлию во Ца́рствии Небе́снем, непреста́нно поéши Бо́гу: Аллилýиа.

И́кос 3

Моли́тве у́мней научи́выйся и до са́мыя кончи́ны ея́ не оста́вивый, непреста́нно и со умилéнием взыва́л еси́ Вседержи́телю: «Го́споди Иису́се Христе́, Сы́не Бо́жий, поми́луй мя гре́шнаго». Ве́дуще и о нас твое́ усéрдное в моли́твах предста́тельство, благогове́йно взыва́ем ти:
Ра́дуйся, всеце́ло попечéнию Бо́жию себе́ преда́вый;
ра́дуйся, шéдый ско́рбным путéм спасéния.
Ра́дуйся, чистоты́ усéрдный храни́телю;
ра́дуйся, вся кра́сная ми́ра сего́ презре́вый.
Ра́дуйся, за смирéние твое Бо́жия благода́ти сподо́бивыйся;
ра́дуйся, еще́ на земли́ све́том небе́сным озарéнный.
Ра́дуйся, пути́ те́снаго во Ца́рствие Небе́сное указа́телю нелéстный;
ра́дуйся, научéнием покая́ния со́весть на́шу очища́яй.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 4

Подража́я житию́ преподо́бных отце́в и пе́ние непреста́нное Го́сподеви вознося́, преподо́бне о́тче Матфéе, всéю жи́знию твоéю подви́жник вели́кий благочéстия яви́лся еси́, научи́ и нас гре́шных непреста́нно Бо́гу вопия́ти: Аллилýиа.

И́кос 4

Ви́дя во вся́ком приходя́щем к тебе́ челове́це о́браз и подо́бие Бо́жие, я́ко Го́споду со тща́нием послужи́ти стреми́лся еси́. Сего́ ра́ди издалéча притека́ху к тебе́ лю́дие, скорбьми́ и боле́зньми отягчéннии, и сих не отри́нул еси́, источа́я исцеле́ния, да́руя утеше́ния, предста́тельствуя в моли́твах. Мы же, зря́ще ве́лия труды́ твоя́, ра́ди спасéния душ на́ших си́це вопиéм:
Ра́дуйся, моли́твами твои́ми дýхи зло́бы побежда́яй;
ра́дуйся, мир и ра́дость о Го́споде в сердца́ на́ша водворя́яй.
Ра́дуйся, неутоми́мый попечи́телю о душа́х на́ших;
ра́дуйся, прибега́ющих к тебе́ кре́пкая надéждо и заступлéние.
Ра́дуйся, неразýмных вразумлéние;
ра́дуйся, призыва́яй гре́шников к слéзному покая́нию.
Ра́дуйся, врачу́ благоискýсный недýгов духо́вных;
ра́дуйся, умягчи́вый ко исправлéнию окамене́лая сердца́.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 5

Смирéн сый, всех приходя́щих к тебе́ словесы́ богомýдраго ста́рца Стефа́на поуча́л еси́: «Ищи́ блажéнство себе́, челове́че, не по твоему́ худо́му разуме́нию, но по указа́нию Бо́жию, я́ко уча́т тебе́ проро́цы и апо́столи, испо́лненнии прему́дрости». Те́мже и нас, в самонаде́янии пребыва́ющих, научи́ возлага́ти жизнь свою́ на про́мысл Бо́жий, взыва́я ко Го́споду: Аллилýиа.

И́кос 5

Зря́ще богоуго́дное житие́ твое́, из градо́в и вéсей во мно́жестве стека́хуся к тебе́ лю́дие Бо́жии, научéния ра́ди духо́внаго, и ни еди́н неуте́шен оты́де от тебе́, о́тче Матфéе, и нас не лиши́ воды́ живы́я, от тебе́ истéкшия, да и мы в ра́дости возглаго́лем ти сицева́я:
Ра́дуйся, вмести́лище доброде́телей духо́вных;
ра́дуйся, изве́стное о лю́дех попечéние.
Ра́дуйся, со святы́ми земли́ Вя́тския вознося́й усе́рдныя моли́твы ко Христу́;
ра́дуйся, о́тче ми́лостивый и кро́ткий.
Ра́дуйся, ангелонра́вный челове́че;
ра́дуйся, безпомо́щных ско́рый помо́щниче.
Ра́дуйся, всех святы́х при́сный дрýже;
ра́дуйся, ско́рый пред Бо́гом хода́таю.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 6

Име́яй вéлие дерзновéние пред Го́сподем, во дни гонéний и нестроéний моли́лся еси́ о Це́ркви Правосла́вней коленопреклонéнно со слеза́ми. Ны́не же нас твои́ми моли́твами огради́ от ересéй па́губных и заблуждéний духо́вных, да неврежде́ны от них чи́стым сéрдцем воззовéм к Бо́гу: Аллилýиа.

И́кос 6

Слы́шавше пра́ведное житие́ твое́ и я́ко богоно́снаго ста́рца тебе́ разуме́юще, все́м приходя́щим к тебе́ сове́тник благи́й был еси. И Ду́хом Святы́м возвеща́л еси́ им пра́вду го́рнюю о послуша́нии церко́внем, любви́ ко и́стине науча́я. Я́коже в них тогда́, ны́не и в нас ве́ру святоотéческую Го́спода умоли́ укрепи́ти, вопию́щих ти си́це:
Ра́дуйся, защи́тниче Правосла́вия;
ра́дуйся, во́ине Христо́в добропобе́дный.
Ра́дуйся, моли́твы лампа́до неугаси́мая;
ра́дуйся, пра́вило ве́ры и благоче́стия.
Ра́дуйся, исто́чниче чуде́с неоскудева́емый;
ра́дуйся, лико́в а́нгельских собесе́дниче.
Ра́дуйся, А́гнцу Бо́жию после́довавый на земли́;
ра́дуйся, мно́жество заблýждших к Це́ркви приведы́й.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 7

Хотя́ Госпо́дь просла́вити тя, о́тче Матфéе, я́ко ве́рнаго раба́ Своего́, дарова́ нам тебе́ тéплаго моли́твенника, оби́лие чудéс источа́ющаго, сего́ ра́ди немо́лчно воспева́ем Благоде́телю Бо́гу: Аллилýиа.

И́кос 7

Юношу, на одре́ лежа́ща и лю́те стра́ждуща, к ме́сту упокоéния твоего́ принесéннаго, исцели́л еси́, и жену́ изба́вил еси́, преподо́бне о́тче Матфéе, от падéния грехо́внаго, призва́в ю к покая́нию сердéчному, и нас немощны́х и гре́шных не оста́ви своéю ми́лоcтию, взыва́ющих к тебе́:
Ра́дуйся, тяготы́ душе́вныя облегча́яй;
ра́дуйся, боле́зни теле́сныя врачýяй.
Ра́дуйся, сострада́ния преиспо́лненный и в ми́лоcти бога́тый;
ра́дуйся, в беда́х и обстоя́ниих ско́рый помо́щниче.
Ра́дуйся, во смирéнии Христу́ служи́вый;
ра́дуйся, наро́ду Бо́жию хода́таю спасéния.
Ра́дуйся, уныва́ющим о́бразе утешéния;
ра́дуйся, от духо́вныя смéрти избавлéние.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 8

Ны́не святы́я мо́щи твоя́, почива́ющия во хра́ме Святы́я Тро́ицы, цельбоно́сныя струи́ источа́ют с вéрою приходя́щим. Мы же исцелéний мно́жеству и чудéс по твои́м моли́твам соверши́вшимся диви́мся, поя́ Бо́гу: Аллилýиа.

И́кос 8

Благода́рственное пе́ние приноси́мое тебе́ не прéзри, о́тче Матфéе, его́же приими́ и ра́дости духо́вныя испо́лни нас, моще́м твои́м святы́м покланя́ющихся и пою́щих:
Ра́дуйся, благода́ти Бо́жия испо́лненный;
ра́дуйся, уго́дниче Бо́жий, преди́вный в чудесе́х.
Ра́дуйся, сердца́ ско́рбная врачýяй;
ра́дуйся, дерзновéние моли́твенное стяжа́вый ко Отцу́ Небе́сному.
Ра́дуйся, земли́ Вя́тския свети́льниче неугаса́емый;
ра́дуйся, Цéркве незы́блемое утверждéние.
Ра́дуйся, по́стников похвало́;
ра́дуйся, и́стиннаго послуша́ния Бо́гу учи́телю.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 9

Гоне́ния претерпе́л еси́ и бе́ды подъя́л еси́, преподо́бне о́тче Матфéе, и ста́до твое́ от нечéстия спа́сл еси́, в весéлии воспева́я Христу́, вся благоустроя́ющему: Аллилýиа.

И́кос 9

Вети́я многовеща́нныя не возмо́гут по достоя́нию воспе́ти дея́ния пра́веднаго жития́ твоего́, и́мже небе́сныя сла́вы сподо́бился еси́, преподо́бне о́тче Матфéе, сея́ сла́вы соприча́стники бы́ти и нам помози́, ди́вный чудотво́рче, да с ве́рою и упова́нием поéм ти:
Ра́дуйся, я́ко твои́м благочéстием науча́емся;
ра́дуйся, и́ноком любвеоби́льный о́тче и наста́вниче.
Ра́дуйся, богомы́слием непреста́нным ум просвети́вый;
ра́дуйся, я́ко на твоя́ моли́твы и по́мощь упова́ем.
Ра́дуйся, дерзновéние вéлие ко Го́споду име́яй;
ра́дуйся, от гро́ба цельбоно́сныя струи́ нам излива́яй.
Ра́дуйся, застýпниче необори́мый и о всем ми́ре моли́твенниче;
ра́дуйся, огнéм ве́ры и рéвности дýши на́ша озаря́яй.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 10

Ви́дя вéлие поруга́ние святы́я оби́тели от людéй рýсских, безбо́жием помрачéнных, напра́вил еси́ стопы́ твоя́ в весь да́льнюю, во е́же та́мо ско́рбным сéрдцем возноси́ти моли́твы Го́сподеви о вразумлéнии отри́нувших благо́е и́го Христо́во, вопия́ Бо́гу песнь: Аллилýиа.

И́кос 10

В цéркви святи́теля Никола́я вéси Беля́евския, моля́ся пред о́бразом покрови́теля хра́ма того́, проси́л еси́ от него́ по́мощи и заступлéния за Русь Правосла́вную, и днесь, укрепля́емии моли́твою твоéю, преподо́бне о́тче Матфéе, вопиéм ти:
Ра́дуйся, пра́здность душегуби́тельную возненави́девый;
ра́дуйся, ка́ющихся с Бо́гом примирéние.
Ра́дуйся, лю́ди в ве́ре и и́стине утвержда́яй;
ра́дуйся, церко́вному послуша́нию патриа́рху Ти́хону учи́вый.
Ра́дуйся, твéрдо обновле́нческая шата́ния отвéргий;
ра́дуйся, расколоучи́телей мýдро обличи́вый.
Ра́дуйся, к покая́нию их призва́вый;
ра́дуйся, духо́вная заблужде́ния ве́ка сего́ зре́ти нас научи́вый.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 11

Царя́ царéй Христа́ Бо́га на́шего восхва́лим: Сей бо я́ко Освяти́тель святы́х дарова́ нам вéлию путево́дную звезду́ в Ца́рство Небе́сное, да све́тиши, о́тче Матфéе, твоему́ отéчествию земно́му, науча́я нас уми́льно взыва́ти ко Святе́й Тро́ице: Аллилýиа.

И́кос 11

Еди́неми усты́ и еди́нем сéрдцем просла́вим Триипоста́снаго Бо́га, чудоде́йствующаго, да́рующаго щедро́ты Своя́ лю́дем во спасéние. Воспои́м ны́не в нетле́нии пребыва́ющаго чудотво́рца Вя́тския земли́ преподо́бнаго Матфéя похвала́ми таковы́ми:
Ра́дуйся, храм Бо́жий в души́ твоéй созда́вый;
ра́дуйся, вéлий наречéнный во Ца́рствии Небе́снем.
Ра́дуйся, я́ко зри́ши лице́ Госпо́дне;
ра́дуйся, све́том Христо́вым дýши на́ша просвеща́яй.
Ра́дуйся, язы́ческих суеве́рий обличи́телю;
ра́дуйся, све́та одея́нием свы́ше облечéнный.
Ра́дуйся, чудеса́ твоя́, я́ко кéдры Лива́нския, умно́живый;
ра́дуйся, ско́рое заступлéние погиба́ющих.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 12

Весели́ся и ра́дуйся, страно́ Вя́тская, возрасти́вшая досточýднаго сы́на твоего́, преподо́бнаго отца́ на́шего Матфéя, и возопи́й к Бо́гу, дарова́вшему ти такова́го покрови́теля и духо́в зло́бы низложи́теля: Аллилýиа.

И́кос 12

Пою́ще сла́вное житие́ твое́, по́двиги же ди́вныя и чудотворе́ния от тебе́ явля́емая, ублажа́ем тя, о́тче Матфéе, я́ко уго́дника Бо́жия преподо́бнаго и па́стыря до́браго. Ты же, Бо́гу предстоя́, при́сно помина́й нас, любо́вию соверша́ющих свящéнную па́мять твою́ и с ра́достию пою́щих ти такова́я:
Ра́дуйся, богоуго́дно течéние земно́е соверши́вый;
ра́дуйся, похвало́ гра́ду Яра́нску и Вя́тския земли́ защи́тниче.
Ра́дуйся, раздая́телю Боже́cтвенных сокро́вищ;
ра́дуйся, со избра́нными Христо́выми кýпно торжествýяй.
Ра́дуйся, лю́ди Бо́жии на прославлéние твое́ призва́вый;
ра́дуйся, архипа́стырей наста́вниче и свящéнников красото́.
Ра́дуйся, воспева́ющих тя благода́тию Боже́cтвенною озаря́яй;
ра́дуйся, Ду́ха Бо́жия испо́лнен, приходя́щих к тебе́ оживля́яй.
Ра́дуйся, преподо́бне о́тче наш Матфе́е, Яра́нский чудотво́рче.

Конда́к 13

О, преподо́бне о́тче Матфéе, ско́рый помо́щниче, моли́твенниче и застýпниче преди́вный, ны́нешнее на́ше молéние приими́, сошéдшияся лю́ди сия́ от небе́с благослови́, ра́зум уцеломýдри, житие́ испра́вити помози́ и к Бо́гу приведи́, да с тобо́ю во ве́ки поéм Ему́: Аллилýиа.
[Се́й конда́к глаго́лется три́жды.]
[Далее повторяем 1‑е икос и кондак:]

Конда́к 2

Конда́к 1, глас 8

И́кос 1

Моли́тва 1

О, Боже́cтвенныя благода́ти до́брый и кра́сный сосýде, преподо́бне о́тче Матфéе! К тебе́ мы гре́шнии и смирéнии моли́твенно прибега́ем и из глубины́ сéрдца взыва́ем: при́зри на ны и умоли́ Человеколю́бца Бо́га, да не осýдит нас по беззако́нием на́шим, но да сотвори́т с на́ми по вели́цей Своéй ми́лоcти. Сохрани́ нас твои́м заступлéнием от облежа́щаго ны суемýдрия и неправове́рия и я́ко па́стырь до́брый упаси́ заблýждшия о́вцы ста́да Христо́ва и во дворы́ Госпо́дни сих всели́. Огради́ нас от собла́знов, ересéй и раско́лов и наста́ви твéрдо в ве́ре правосла́вней подвиза́тися. Сохрани́ зéмлю Вя́тскую и вся́ ве́си и гра́ды Росси́йския невреди́мы от вся́каго зла. Умоли́ Го́спода, да низпослéт нам ти́хое и Богоуго́дное житие́, уврачýет Своéю бла́гостию на́ша боле́зни душе́вныя и теле́сныя, согре́ет сердца́ на́ша любо́вию друг ко дрýгу и сотвори́т ны братолюби́вы и единомы́сленны. При́зри на всех с ве́рою к тебе́ притека́ющих и прося́щих у тебе́ вели́кия и бога́тыя ми́лоcти. Да сподо́бит Госпо́дь че́cтно пра́зднующих святýю па́мять твою́ грехо́в оставлéния, да и мы вси с тобо́ю просла́вим Всесвято́е И́мя Отца́, и Сы́на, и Свята́го Ду́ха, во ве́ки веко́в. Ами́нь.

Моли́тва 2

Яко фимиа́м благоуха́нный, Бо́гови возжжéнный, суть святы́я мо́щи твоя́, преподо́бне о́тче Матфéе. Благода́тию Ду́ха Свята́го ве́рных сердца́ наполня́еши, к моли́тве и благоугождéнию Го́сподеви и бли́жним на ра́дость спасéния воздвиза́еши. Приходя́щии же к ра́це твоéй освяща́ются, духо́вным ми́ром помазýются, от бед и напа́стей избавля́ются. О, преподо́бне о́тче, смирéнно припа́даем ко святы́м мощéм твои́м и вопиéм ти: моли́ Влады́ку Христа́, ми́лоcть обрести́ нам в день после́дняго испыта́ния сýднаго и сподо́би нас со все́ми святы́ми сла́вити, восхваля́ти и велича́ти Человеколю́бца Бо́га, Отца́, и Сы́на, и Свята́го Ду́ха, во ве́ки веко́в. Ами́нь.

Моли́тва 3

О, преподо́бне о́тче наш Матфéе, Яра́нский чудотво́рче! От ю́ности твоея́ всем сéрдцем Христа́ возлюби́вый, испо́лненный Ду́ха ве́ры и благочéстия, невозвра́тным жела́нием Тому́ Еди́ному после́довал еси́, сéрдцем смирéнным вся за́поведи Госпо́дни исполня́я. Ты о́браз а́нгельскаго жития́ прия́л еси́, неле́ностно подвиза́яся в посте́, бде́нии и моли́тве, возшéл еси́ на высоту́ доброде́телей, восприéм от Всещéдраго Бо́га мно́жество благода́тных даро́в духо́вных. Дар прозорли́вости, дар недýгов душéвных и телéсных врачева́ния еще́ на земли́ оби́льно в тебе́ яви́ся. Мно́гим был еси́ до́брый наста́вник и уте́шитель, па́стырь и моли́твенник. Во дни ско́рби и лю́таго гонéния от безбо́жных, во дни нестроéния и смýты ты, я́ко звезда́ светоза́рная в нощи́, правосла́вным лю́дем ве́рный путь спасéния озари́л еси́, па́стырей в по́двизе испове́дничества и му́ченичества утвержда́я, мона́шествующих непрело́жно сле́довати за́поведем Христо́вым науча́я, мно́жество ве́рных чад це́ркве на́шея утеша́я и вразумля́я. Сам же гоне́ния, ско́рби и боле́зни претерпе́в, ны́не оте́чества небе́снаго дости́гл еси́, по преставлéнии твоéм дýхом от нас не отлуча́яся, оби́льно благода́тную по́мощь подава́я всем с ве́рою и любо́вию притека́ющим к тебе́. Те́мже смирéнно мо́лим тя, преподо́бне о́тче наш Матфéе, ны́не вкýпе с преподо́бными Три́фоном, Леони́дом, Стефа́ном, блажéнным Проко́пием и все́ми святы́ми земли́ Вя́тския, вознеси́ твоя́ благомо́щныя моли́твы ко Христу́ Спа́су на́шему и испроси́ у Него́ ве́ры правосла́вныя утверждéние, па́стырем рéвности, мона́шествующим в по́двизех благи́х неле́ностно подвиза́тися, всем же христиа́ном благочеcти́ваго и доброде́тельнаго жи́тельства. Научи́ нас всéю душéю и сéрдцем возноси́ти Пречестно́е, Великоле́пое И́мя Го́спода на́шего Иису́са Христа́, Его́же возлюби́л еси́, с Ни́мже прославля́юще Безнача́льнаго Его́ Отца́ и Всесвята́го Ду́ха, ны́не и при́сно, и во ве́ки веко́в. Ами́нь.