Акафист святому мученику Алексию Елнатскому (Ворошину)

Кондак 1

Избранный от Бога молитвенниче за зeмлю русскую, в годину лютую тяжкий подвиг юродства приeмый, и мученическим венцeм преславно украсивыйся, восхваляем тя любовию, блажeнне Алексие, ты же, водворяяся ныне во обителех Отца Небеcнаго, от всяких нас искушeний и бед свободи, да зовeм ти:
Радуйся, Алексие, скорый заступниче и молитвенниче о нас ко Господу.

Икос 1

Ангельскаго во плоти жития возжелeв, тому воистинну поревновал еси, Алексие, и смыслен сый, несмысленныя похоти плотския духу покорил еси, темже тебе верою взываем:
Радуйся, невесту земную и сладости мира оставивый.
Радуйся, Христу себе обручивый и царства Его вседушно взыскавый.
Радуйся, искус послушания монашескаго в разуме духовне прошeдый.
Радуйся, в подвизе затвора и молитвы благодать господню сугубую восприeмый.
Радуйся, яко на брань со князем тьмы века сего себе предуготовал еси.
Радуйся, яко образ власти Боголюбивыя верным показал еси.
Радуйся, судeб Божиих недоведомых дивный таинниче.
Радуйся, имеющым разум грядущих скорбeй провозвестниче.
Радуйся, Алексие, скорый заступниче и молитвенниче о нас ко Господу.

Кондак 2

Видя, блажeнне, просвещeнными сeрдца очесы оскудение веры народа русскаго, гнев Божий праведно на ны движимый возвестил еси, глаголя: молитеся Богу, и убойтеся грома гнева его, и поне отныне покайтеся, зовуще ему: Аллилуиа.

Икос 2

В разуме духовне, Алексие, восходя от силы в силу, по девятих летех уединeния и молитвы, сугубый подвиг юродства Христа ради подъял еси, Симону блажeнному подражая, с нимже ныне сице тя ублажаем:
Радуйся, мудрование плотское отринувый.
Радуйся, просвещeние свыше приeмый.
Радуйся, древним подвижником по духу подобный.
Радуйся, странниче, не имевый, где главы подклонити.
Радуйся, чаявый во отечестве небеcнем вселитися.
Радуйся, наготу и мраз зимный Христа ради доблественне претерпевый.
Радуйся, на лоне Авраамли с Лазарем ныне греемый.
Радуйся, Алексие, скорый заступниче и молитвенниче о нас ко Господу.

Кондак 3

Силою, данною ти свыше, блажeнне, прорeкл еси мнозем изгнание и заточeние, имений и крова лишeние, некиим же от лютыя смeрти и бед избавлeние, всем же, любовию тя призывающым, помощник скорый являешися, поющым о тебе Богу: Аллилуиа.

Икос 3

Имея совершeнную яже к Богу любовь и о людех болезнование сердeчное, вшeл еси во храм Божий, блажeнне, якоже ругатель и сквернитель, мeрзость запустения на месте святе юродственно предрeк. Мы же о своих гресех и о заблуждших сынех российских слeзы точаще, в молитву тя призываем, глаголюще:
Радуйся, подобно Иеремии пророку рыданий и слeз иский.
Радуйся, о новем Иерусалиме: Святей Руси разорeнней горце восплакавый.
Радуйся, о народе твоeм, в плену вавилонстем сущем из глубины души воздыхавый.
Радуйся, радость избавлeния тому прикровeнно поведавый.
Радуйся, нищий духом, нетленное богатство Царствия Небеснаго наследивый.
Радуйся, с плачущими ныне утешенный.
Радуйся, ругания и раны Христа ради приeмый.
Радуйся и веселися, яко мзда твоя многа на небесех.
Радуйся, Алексие, скорый заступниче и молитвенниче о нас ко Господу.

Кондак 4

Бурею Христоубийства дышуще, властители беззаконнии, егда ощутиша тя, святе, во оправданиих Господних непорочно ходяща, яко дух Божий почи на тебе, тогда хулeния и злобы исполнени, тя яко безумна оклеветаху, и приставником немилостивым вдаяху, мы же живущую в тебе благодать Господню почитающе, поeм: Аллилуиа.

Икос 4

Слышав страшную весть о гонeниих, не устрашился еси, Алексие доблественне, но яко воин, не связуяйся оброки житeйскими, изшeл еси на брань с миродержителем тьмы века сего, да Воеводе угоден будеши, услыши убо от нас победное пение:
Радуйся, час страдания и кончины твоея дивно предуведевый.
Радуйся, прeжде часа того сродники и други на погребeние твое призвавый.
Радуйся, ко страданием за Христа желанием устремивыйся.
Радуйся, ко ищущым яти тя самовластно пришeдый.
Радуйся, яко Христу подобяся со беззаконными вменился еси.
Радуйся, яко в темнице тесней со разбойники заключился еси.
Радуйся, скудную пищу твою соузником отложивый.
Радуйся, во бдении, посте и молитве до кончины непрестанно пребывый.
Радуйся, Алексие, скорый заступниче и молитвенниче о нас ко Господу.

Кондак 5

Боготeчная звезда явился еси отечеству твоему, обуреваему скорбми многими, утверждeн бо в законе Господни, яко на твeрди небеcней, Алексие досточудне, светозаряеши путь спасeния верным, благодарно поющым Господеви: Аллилуиа.

Икос 5

Видеша мучители нечестивии, яко ничтоже в тебе достойно смeрти обретают, обаче лeстию и прещeньми запяти тя помышляху, да сам себе яко злодея оклеветаеши, на раскалeнныя плинфы, мучаще тя, поставиша, мы же таковому долготерпению твоему дивящеся, взываем:
Радуйся, кроткому Иисусу в незлобии подражателю.
Радуйся, о вразех твоих милосeрдный молитвенниче.
Радуйся, воли Божией смирeнный послушниче.
Радуйся, нечeстия законопреступных безмолвный обличителю.
Радуйся, яко смирил еси себе пред враги твоими.
Радуйся, яко во смирeнии твоeм помяну тя Господь.
Радуйся, суд Божий о начальнице темницы предуведевый.
Радуйся, о скорби в его доме имущей быти явственно предрекий.
Радуйся, Алексие, скорый заступниче и молитвенниче о нас ко Господу.

Кондак 6

Проповедник благодати Господни, в тебе живущей, явися мучитель, егда узрев предречeнную тобою кончину супружницы, повеле, да престанут мучаще тя, убояся бо Бога и неволею возопи: Аллилуиа.

Икос 6

Возсиял еси, яко злато, очищeнно в горниле страданий, Алексие пресветле, егда в темнице ранами боля, душeю же радуяся, отшeл еси от земли к небеcным. Мы же благосeрдный плачь о разлучeнии твоeм восприимше, сице глаголем:
Радуйся, тя бо вмале утешeние в скорбех земных имехом.
Радуйся, тя бо Ангела и ходатая на Небеси обретохом.
Радуйся, яко голубь чист и незлобив, горе возлетевый.
Радуйся, яко бисер многоценен душу твою освящeнну Владыце представивый.
Радуйся, тя бо сродницы твои, якоже рeкл еси, погребоша.
Радуйся, яко тии праведное житие и кончину твою чадом чад своих поведаша.
Радуйся, и по смeрти неусыпный о нас попечителю.
Радуйся, с путий стропотных на стези правыя дивный наставниче.
Радуйся, Алексие, скорый заступниче и молитвенниче о нас ко Господу.

Кондак 7

Хотя Богохульное отгнати злосмрадие от отечества твоего, благоухание Христово явился еси, Алексие, да вси благочеcтно чтущии память твою, образом жития твоего ко спасeнию наставляеми, благодарно Богу поют: Аллилуиа.

Икос 7

Новый Алексий и человек Божий явился еси в последняя лета в российстей земли, невесту и други Христа ради оставивый, во сродницех чуждь и странен пребывый. Того убо, братие, ревнующе кийждо по силе своeй, житию, мирския пристрастия от сeрдца отринем, Алексия же чуднаго сице да ублажим:
Радуйся, цвете российскаго луга духовнаго.
Радуйся, светильниче жития добродетельнаго.
Радуйся, источник блажeннаго Симона местом уединeнных подвигов избравый.
Радуйся, источник благочeстия жаждущым правды явивыйся.
Радуйся, человече небеcный.
Радуйся, во плоти воистинну Ангеле.
Радуйся, яко тя избрал и приял есть Господь славы.
Радуйся, яко память твоя в род и род.
Радуйся, Алексие, скорый заступниче и молитвенниче о нас ко Господу.

Кондак 8

Странное чудо является всем притекающым верою свящeнная рака мощeй твоих, Алексие, яко да молитвами твоими от недугов и бед свобождаеми, с весeлием вопиeм: Аллилуиа.

Икос 8

Вeсь возложил еси себе Господеви, блажeнне, и в Бозе молитвы нашя приeмлеши, мы же тя прибежище в скорбех обретше, сице взываем:
Радуйся, место погребeния твоего неосквернeнно соблюдый.
Радуйся, чеcтныя твоя мощи во утешeние верным даровати изволивый.
Радуйся, обители введeнския благодатное украшeние.
Радуйся, радосте и покрове к тебе притекающих.
Радуйся, верою просящым исцеления подаваяй.
Радуйся, скорби и обстояния потребляяй.
Радуйся, духов злых и недуг прогонителю.
Радуйся, страждущих душeю и телом безмeздный целителю.
Радуйся, Алексие, скорый заступниче и молитвенниче о нас ко Господу.

Кондак 9

Все естество ангельское возвеселил еси, Алексие, чиcтотою твоeю, сретшее тя ныне горе в небеcных, с нимиже воспеваеши Богу вечную песнь: Аллилуиа.

Икос 9

Ветия суемудренныя и прегордыя посрамил еси, блажeнне, прост бо и чист сeрдцем сый, Христа выну в себе имел еси. Темже приими от нас похвалы сии:
Радуйся, сокровища мира сего ни во чтоже вменивый.
Радуйся, сокровище сердeчное некрадомо до смeрти соблюдый.
Радуйся, душу твою непорочну Христови представивый.
Радуйся, с праведными яко солнце просиявый.
Радуйся, ко Господу о нас дерзновeнный ходатаю.
Радуйся, нужд наших душeвных и телeсных ведче.
Радуйся, благоутишное прибежище скорбных и отчаянных.
Радуйся, миро молитв твоих изливаяй на раны душевныя.
Радуйся, Алексие, скорый заступниче и молитвенниче о нас ко Господу.

Кондак 10

Спасти хотя душу твою, Алексие, не совещался еси плоти и крови, но взeм крeст твой евангельски последовал еси Христу, в радости духовней воспевая ему: Аллилуиа.

Икос 10

Царю единому и Господу работаяй, под чуждый ярeм не преклонился еси, Богомудре, свободу духа во Христе стяжав, мы же пленницы суще страстeй и вожделeний наших, с любовию ти зовeм:
Радуйся, Царя царствующих воине доблемудренный.
Радуйся, равностоятелю воинств небеcных.
Радуйся, царство Божие внутрь себе обретый.
Радуйся, преизoбильно ныне славы Царствия наслаждаяйся.
Радуйся, пeрвее по благодати душу твою от страстeй свободивый.
Радуйся, духом свободь во узах и темнице пребывый.
Радуйся, и нас бедствующих от плена греховнаго свобождаяй.
Радуйся, свободу славы чад Божиих нам в себе показуяй.
Радуйся, Алексие, скорый заступниче и молитвенниче о нас ко Господу.

Кондак 11

Пение всеумилeнное приими от нас, Алексие, изнемогает бо ум наш тайну смирeния твоего разумети, обаче верующе тeплому заступлeнию твоему, сeрдцем и усты вопиeм Богу: Аллилуиа.

Икос 11

Светильник Богосиянный явился еси во отечестве твоeм, блажeнне, егоже не обуят безбожия тьма. Темже и мы от тьмы неведения ко свету Христову прешeдше, тя величаем, глаголюще:
Радуйся, пустыни елнатския крине благоуханный.
Радуйся, в годину гонeний дивно процветый добродетельми.
Радуйся, в вертограде райстем насаждeнный.
Радуйся, сладостию небеcною верныя напояяй.
Радуйся, зерцало немутное света евангельскаго.
Радуйся, яко просветил еси нечeстием омраченныя.
Радуйся, в лице новомучеников российских водворяяйся.
Радуйся, яко с ними вкупе молиши Бога за русь православную.
Радуйся, Алексие, скорый заступниче и молитвенниче о нас ко Господу.

Кондак 12

Благодать Всесвятаго Духа испроси нам у Бога, блажeнне, да милоcтив будет неправдам нашым, да и мы с тобою и со всеми новомученики российскими неизречeнную благость Его прославим, поюще: Аллилуиа.

Икос 12

Поюще твоя чудеса, Алексие блажeнне, и почитающе подвиг твой, почитаем дивнаго во святых своих Христа Бога, иже вчера, и днeсь, и во веки Тойже, Иже и укрепи тя на подвиг сeй, и нам немощным силен есть крепость подати, с верою тя призывающым:
Радуйся, за грешныя люди российския тeплый предстателю.
Радуйся, земли Кинешeмския Богодарованное сокровище.
Радуйся, града Иваново-Вознесeнска небеcный хранителю.
Радуйся, от всех конец притекающым к раце твоeй скорый утешителю.
Радуйся, обидимых невидимое защищeние.
Радуйся, обидящих тайное вразумлeние.
Радуйся, недугов и нужд избавлeние.
Радуйся, в печали о гресех сущих светлое радование.
Радуйся, Алексие, скорый заступниче и молитвенниче о нас ко Господу.

Кондак 13

О угодниче Божий, преблажeнный отче наш Алексие, приими недостойными гласы приносящих ти похвалу сию, и от геeнны избавити ны потщися тeплым твоим предстательством, да с тобою воспеваем: Аллилуиа (Трижды).
[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Кондак 1