Триодь, -1-я Неделя по Пасхе.

Глас 4

Песнь 1

Ирмос: Яви́шася исто́чницы бе́здны, / вла́ги неприча́стны, / и откры́шася мо́ря волну́ющася основа́ния бу́рею, / ма́нием бо запрети́л еси́ ему́, / изря́дныя же лю́ди спасл еси́, / пою́щия побе́дную песнь Тебе́, Го́споди.
Сла́ва Отцу́ и Сы́ну и Свято́му Ду́ху.
Из уст младе́нец незло́бивых и ссу́щих, / хвалу́ Твои́х раб соверши́л еси́, / разруши́ти супоста́та, / и отмсти́ти стра́стию Креста́, паде́ние дре́вняго Ада́ма, / дре́вом же воскреси́ти сего́, / пою́ща побе́дную песнь Тебе́, Го́споди.
И ны́не и при́сно и во ве́ки веко́в. Ами́нь.
Хвале́ние Це́рковь преподо́бных, / живу́щему в Сио́не, Тебе́, Христе́, прино́сит, / о Тебе́ же Изра́иль, Творце́ свое́м, ра́дуется, / и го́ры язы́цы противообра́знии каменосерде́чнии, от лица́ Твоего́ возвесели́шася, / пою́ще побе́дную песнь Тебе́, Го́споди.

Песнь 3

Ирмос: Точа́щий, краесеко́мый повеле́нием Твои́м, / тве́рдый сса́ша Ка́мень изра́ильтестии лю́дие. / Ка́мень же Ты еси́, Христе́ и Жизнь, / на Не́мже утверди́ся Це́рковь, зову́щая: / оса́нна, благослове́н еси́ Гряды́й.
Сла́ва Отцу́ и Сы́ну и Свято́му Ду́ху.
Мертвеца́ четверодне́вна повеле́нием Твои́м, / из ме́ртвых с тре́петом ад испусти́ Ла́заря. / Воскресе́ние бо Ты, Христе́ и жизнь, / в Не́мже утверди́ся Це́рковь зову́щи: / оса́нна, благослове́н еси́ Гряды́й.
И ны́не и при́сно и во ве́ки веко́в. Ами́нь.
Воспойте, лю́дие, боголе́пно в Сио́не, / и моли́тву воздади́те Христу́ во Иерусали́ме, / Сам гряде́т во сла́ве со о́бластию: / в Не́мже утверди́ся Це́рковь зову́щи: / оса́нна, благослове́н еси́ Гряды́й.

Седален, глас 6

С ве́твьми воспе́вше пре́жде, / с древесы́ последи́ я́ша Христа́ Бо́га, неблагода́рнии иуде́е. / Мы же ве́рою непрело́жною при́сно почита́юще, / я́ко благоде́теля, вы́ну вопие́м Ему́: / благослове́н еси́, Гряды́й Ада́ма воззва́ти.

Песнь 4

Ирмос: Христо́с гряды́й – я́вственно Бог наш, / прии́дет и не закосни́т, / от горы́ приосене́нныя ча́щи, / Отрокови́цы ражда́ющия Неискусому́жныя, / проро́к дре́вле глаго́лет. / Тем вси вопие́м: / сла́ва си́ле Твое́й, Го́споди.
Припев: Сла́ва Тебе́, Бо́же на́ш, сла́ва Тебе́.
Да то́чат весе́лие кре́пкое масти́тельное, го́ры, и вси хо́лми, / и древа́ дубра́вная да взыгра́ют: / Христа́ хвали́те, язы́цы, / и Тому́ вси лю́дие ра́дующеся возопи́йте: / сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху.
Кре́постию ца́рствуяй ве́ки Госпо́дь, облече́н прии́дет, / Сего́ красоты́ же и сла́вы, несравне́нно есть благоле́пие в Сио́не. / Те́мже вси вопие́м: / сла́ва си́ле Твое́й, Го́споди.
И ны́не и при́сно и во ве́ки веко́в. Ами́нь.
Пя́дию изме́ривый небо, дла́нию же зе́млю, / Госпо́дь прии́де, Сио́н бо избра́, / в не́мже жи́ти и ца́рствовати изво́ли, / и возлюби́ лю́ди ве́рно вопию́щия: / сла́ва си́ле Твое́й, Го́споди.

Песнь 5

Ирмос: На го́ру Сио́н взы́ди, благовеству́яй, / и Иерусали́му пропове́дуяй, / в кре́пости вознести́ глас: / пресла́вная глаго́лашася о Тебе́, Гра́де Бо́жий, / мир на Изра́иля и спасе́ние язы́ком.
Сла́ва Отцу́ и Сы́ну и Свято́му Ду́ху.
В вы́шних седя́й на херуви́мех Бог, / и призира́яй на смире́нныя, / Той гряде́т во сла́ве со о́бластию, / и испо́лнятся вся́ческая Боже́ственныя хвалы́ Его́. / Мир на Изра́иля и спасе́ние язы́ком.
И ны́не и при́сно и во ве́ки веко́в. Ами́нь.
Сио́не Бо́жий, горо́ свята́я, и Иерусали́ме, / о́крест о́чи твои́ возведи́ и виждь / со́бранная ча́да твоя́ в тебе́, / се бо приидо́ша издале́ча, поклони́тися Царю́ твоему́. / Мир на Изра́иля и спасе́ние язы́ком.

Песнь 6

Ирмос: Возопи́ша с весе́лием пра́ведных ду́си: / ны́не ми́ру Заве́т Но́вый завеща́ется, / и кропле́нием да обновя́тся лю́дие, Бо́жия Кро́ве.
Сла́ва Отцу́ и Сы́ну и Свято́му Ду́ху.
Приими́ Изра́илю Бо́жие ца́рство, / и пребыва́яй во тьме, свет да у́зрит вели́кий, / и кропле́нием да обновя́тся лю́дие, / Боже́ственныя Кро́ве.
И ны́не и при́сно и во ве́ки веко́в. Ами́нь.
Разреше́ны своя́ ю́зники Сио́не испусти́, / и от ро́ва неве́дения безво́дна изведи́, / и кропле́нием да обновя́тся лю́дие, / Боже́ственныя Кро́ве.

Кондак, глас 6

На престо́ле на Небеси́, / на жребя́ти на земли́ носи́мый, Христе́ Бо́же, / А́нгелов хвале́ние / и дете́й воспева́ние прия́л еси́, зову́щих Ти: / благослове́н еси́, Гряды́й Ада́ма воззва́ти.

Икос

Поне́же а́да связа́л еси́ Безсме́ртне, / и смерть умертви́л еси́, / и мир воскреси́л еси́, / с ва́иами младе́нцы восхваля́ху Тя, Христе́, я́ко победи́теля, / зову́ще Ти днесь: оса́нна Сы́ну Дави́дову. / Не ктому́ бо, рече́, закла́ни бу́дут младе́нцы, за Младе́нца Мари́ина, / но за вся младе́нцы и ста́рцы, Еди́н распина́ешися. / Не ктому́ на нас вмести́тся меч: / Твоя́ бо ре́бра прободу́тся копие́м. / Те́мже ра́дующеся глаго́лем: / благослове́н гряды́й Ада́ма воззва́ти.

Песнь 7

Ирмос: Спасы́й во огни́ Авраа́мския Твоя́ о́троки, / и халде́и уби́в, / я́же Пра́вда пра́ведно уловля́ше, / препе́тый Го́споди, / Бо́же оте́ц на́ших, благослове́н еси́.
Припев: Сла́ва Тебе́, Бо́же на́ш, сла́ва Тебе́.
Покланя́ющеся лю́дие, / и со ученики́ ра́дующеся, с ва́ием, / оса́нна Сы́ну Дави́дову зовя́ху: / препе́тый Го́споди Бо́же оте́ц, благослове́н еси́.
Сла́ва Отцу́ и Сы́ну и Свято́му Ду́ху.
Неискусозло́бное мно́жество, еще́ младе́нствующее естество́, / боголе́пно Тя, Царю́ Изра́ильтеский и А́нгельский, воспе́т: / препе́тый Го́споди Бо́же оте́ц, благослове́н еси́.
И ны́не и при́сно и во ве́ки веко́в. Ами́нь.
С ва́ием Тя, Христе́, ве́твьми похваля́ху мно́жества, / благослове́н прише́дый Царь веко́в. / Вопия́ху же: препе́тый Го́споди Бо́же оте́ц, благослове́н еси́.

Песнь 8

Ирмос: Весели́ся, Иерусали́ме, торжеству́йте, лю́бящии Сио́на, / Ца́рствуяй бо во ве́ки Госпо́дь Сил прии́де. / Да благогове́ет вся земля́ от лица́ Его́, / и да вопие́т: / благослови́те вся дела́ Госпо́дня, Го́спода.
Припев: Сла́ва Тебе́, Бо́же на́ш, сла́ва Тебе́.
На жребя́ мла́до всед Царь твой, Сио́не, / предста́ Христо́с: безслове́сную бо и́дольскую пре́лесть разруши́ти, / и неудержа́нное стремле́ние уста́вити всех язы́к прии́де, во е́же пе́ти: / вся дела́, по́йте Го́спода.
Благослови́м Отца́ и Сы́на и Свята́го Ду́ха, Го́спода.
Бог твой, ра́дуйся, Сио́не, зело́, / воцари́ся во ве́ки Христо́с. / Сей, я́коже пи́сано есть, кро́ткий и спаса́яй, / пра́ведный Изба́витель наш, прии́де на жребя́ти, / ко́нское свире́пство уби́ти враго́в, не вопию́щих: / благослови́те вся дела́ Госпо́дня, Го́спода.
И ны́не и при́сно и во ве́ки веко́в. Ами́нь.
Оскудева́ет Боже́ственных огражде́ний, / законопресту́пное со́нмище непокори́вых, / поне́же дом моли́твы Бо́жия, верте́п сотвори́ша разбо́йническ, / от се́рдца Изба́вителя отри́нувше, Ему́же вопие́м: / благослови́те вся дела́ Госпо́дня, Го́спода.

Песнь 9

Ирмос: Бог Госпо́дь и яви́ся нам. / Соста́вите пра́здник, / и веселя́щеся прииди́те, возвели́чим Христа́, / с ва́иями и ве́твьми, пе́сньми зову́ще: / благослове́н Гряды́й во и́мя Го́спода, Спа́са на́шего.
Припев: Сла́ва Тебе́, Бо́же на́ш, сла́ва Тебе́.
Язы́цы вску́ю шата́етеся? / Пи́сменницы, и свяще́нницы, почто́ тще́тным поучи́стеся? / Кто Сей, ре́кше, / Ему́же де́ти с ва́ием и ве́твьми, пе́сньми зову́т: / благослове́н гряды́й во И́мя Го́спода, Спа́са на́шего.
Сла́ва Отцу́ и Сы́ну и Свято́му Ду́ху.
Сей Бог наш, Ему́же никто́же подо́бен, / пра́ведный всяк путь изобре́т, даде́ возлю́бленному Изра́илю. / По сих же с челове́ки поживе́ я́влься: / благослове́н гряды́й во И́мя Го́спода, Спа́са на́шего.
И ны́не и при́сно и во ве́ки веко́в. Ами́нь.
Собла́зны стези́, что близ вас положи́сте непокори́вии? Но́ги ва́ша ско́ры кровь излия́ти Влады́чню, / но воскре́снет вся́ко спасти́ зову́щия: / благослове́н гряды́й во И́мя Го́спода, Спа́са на́шего.

Молитва на Вход Господень в Иерусалим

Го́споди Иису́се Христе́ Бо́же наш, в вы́шних со Отце́м на Престо́ле седя́й, вы́ну на крылу́ от Херуви́м носи́мый и пева́емый от Серафи́м, во днех же пло́ти Своея́ на жребя́ти о́сли се́сти изво́ливый на́шего ра́ди спасе́ния, и от дете́й воспева́ние прия́вый и во Святы́й град Иерусали́м пре́жде шести́ дней бытия́ Па́схи на во́льную страсть прише́дый, да спасе́ши мир Кресто́м, погребе́нием и Воскресе́нием Твои́м! И я́коже тогда́ лю́дие, седя́щие во тьме и се́ни сме́ртней, прие́мши ве́тви древе́с и ва́иа от фи́ник, срето́ша Тя, Сы́на Дави́дова Тя испове́дуя, та́кожде и нас ны́не в предпра́зднственный день сей в подража́ние о́нех ва́иа и ве́тви в рука́х нося́щих соблюди́ и сохрани́. И я́коже о́нии наро́ди и де́ти “оса́нна” Тебе́ приноша́ху, сподо́би и нам во псалма́х и пе́ниих духо́вных душа́ми чи́стыми и нескве́рными усты́ просла́вити вся вели́чия Твоя́ в пра́здник сей и во всю седми́цу стра́сти Твоея́ и неосужде́нно дости́гнути и причасти́тися Боже́ственныя ра́дости Святы́я Па́схи в пресве́тлые дни Живоно́снаго Воскресе́ния Твоего́, да воспое́м и просла́вим Твое́ Божество́ вку́пе со Безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом всегда́ ны́не и при́сно и во ве́ки веко́в. Ами́нь.