Гóсподи Бóже наш, в Негóже вéровахом, и Егóже и́мя пáче вся́каго и́мене призывáем, даждь нам, ко сну отходя́щим, ослáбу души́ и тéлу, и соблюди́ нас от вся́каго мечтáния, и тéмныя слáсти кромé; устáви стремлéние страстéй, угаси́ разжжéния востáния телéснаго. Даждь нам целому́дренне пожи́ти дéлы и словесы́; да добродéтельное жи́тельство восприéмлюще, обетовáнных не отпадéм благи́х Твои́х, я́ко Благословéн еси́ во вéки. Ами́нь.