Воспевáю благодáть Твою́, Влады́чице, молю́ Тя, ум мой облагодати́. Ступáти прáво мя настáви, путéм Христóвых зáповедей. Бдéти к пéсни укрепи́, уны́ния сон отгоня́ющи. Свя́зана плени́цами грехопадéний, мольбáми Твои́ми разреши́, Богоневéсто. В нощи́ мя и во дни сохраня́й, борю́щих враг избавля́ющи мя. Жизнодáтеля Бóга рóждшая, умерщвлéна мя страстьми́ оживи́. Яже Свет невечéрний рóждшая, ду́шу мою́ ослéпшую просвети́. О, ди́вная Влады́чня палáто, дом Ду́ха Божéственна менé сотвори́. Врачá рóждшая, уврачу́й души́ моея́ многолéтныя стрáсти. Волну́ющася житéйскою бу́рею, ко стези́ мя покая́ния напрáви. Избáви мя огня́ вéчнующаго, и чéрвия же злáго, и тáртара. Да мя не яви́ши бесóм рáдование, и́же мнóгим грехóм пови́нника. Нóва сотвори́ мя, обетшáвшаго нечу́вственными, Пренепорóчная, согрешéнии. Стрáнна му́ки вся́кия покажи́ мя, и всех Влады́ку умоли́. Небéсная ми улучи́ти весéлия, со всéми святы́ми, сподóби. Пресвятáя Дéво, услы́ши глас непотрéбнаго рабá Твоегó. Струю́ давáй мне слезáм, Пречи́стая, души́ моея́ сквéрну очищáющи. Стенáния от сéрдца приношу́ Ти непрестáнно, усéрдствуй, Влады́чице. Молéбную слу́жбу мою́ приими́, и Бóгу благоутрóбному принеси́. Превы́шшая Ангел, мирскáго мя превы́шша сли́тия сотвори́. Светонóсная Сéне небéсная, духóвную благодáть во мне напрáви. Ру́це воздéю и устнé к похвалéнию, осквернéны сквéрною, Всенепорóчная. Душетлéнных мя пáкостей избáви, Христá прилéжно умоля́ющи; Ему́же честь и поклонéние подобáет, ны́не и при́сно и во вéки векóв, ами́нь.