Песнь степе́ней, 122
К Тебе возведо́х о́чи мои, живу́щему на Небеси́. Се яко о́чи раб в руку́ госпо́дий своих, яко о́чи рабы́ни в руку́ госпожи́ своея́, та́ко о́чи на́ши ко Господу Богу на́шему, до́ндеже уще́дрит ны. Поми́луй нас, Господи, поми́луй нас, яко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.