Псалом Давиду, во испове́дание, 99
Воскли́кните Бо́гови вся земля́, рабо́тайте Господеви в весе́лии, вни́дите пред Ним в ра́дости. Уве́дите, яко Господь Той есть Бог наш: Той сотвори́ нас, а не мы, мы же лю́дие Его и о́вцы па́жити Его. Вни́дите во врата́ Его во испове́дании, во дворы́ Его в пе́ниих: испове́дайтеся Ему, хвали́те имя Его. Яко благ Господь, в век ми́лость Его, и да́же до рода и рода и́стина Его.