В конец, разума Дави́ду. Внегда́ приити́ Дои́ку Идуме́йску, и возвести́ти Сау́лу, и рещи́ ему: прии́де Давид в дом Авимеле́хов, 51
Что хва́лишися во зло́бе, сильне? Беззако́ние весь день. Непра́вду умы́сли язык твой, яко бри́тву изощре́ну сотвори́л еси́ лесть. Возлюби́л еси́ зло́бу па́че благосты́ни, неправду, не́же глаго́лати правду. Возлюби́л еси́ вся глаго́лы пото́пныя, язык льстив. Сего ради Бог разруши́т тя до конца, восто́ргнет тя, и пресели́т тя от селения твоего, и корень твой от земли живых. Узрят пра́веднии и убоя́тся, и о нем возсмею́тся и рекут: се человек, и́же не положи́ Бога Помо́щника себе, но упова́ на мно́жество богатства своего, и возмо́же суетою своею. Аз же я́ко ма́слина плодови́та в дому́ Божии, уповах на милость Божию во век, и в век века. Испове́мся Тебе во век, я́ко сотвори́л еси́, и терплю́ имя Твое, я́ко бла́го пред преподо́бными Твоими.