В конец, в песнех о осмом, псалом Давиду, 6
Господи, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Поми́луй мя, Го́споди, я́ко не́мощен есмь, исцели́ мя, Господи, я́ко смято́шася ко́сти моя. И душа́ моя смяте́ся зело́: и Ты, Господи, доко́ле? Обрати́ся, Господи, изба́ви ду́шу мою: спаси́ мя ра́ди ми́лости Твоея́. Яко не́сть в сме́рти помина́яй Тебе: во а́де же кто испове́стся Тебе? Утруди́хся воздыха́нием моим, измы́ю на вся́ку нощь ло́же мое, слеза́ми мои́ми посте́лю мою омочу́. Смяте́ся от я́рости о́ко мое, обетша́х во всех вразе́х моих. Отступи́те от мене́, вси де́лающии беззако́ние, я́ко услы́ша Господь глас пла́ча моего́: услы́ша Господь моле́ние мое, Господь моли́тву мою прия́т. Да постыдя́тся и смяту́тся вси врази́ мои, да возвратя́тся и устыдя́тся зело́ вско́ре.