Кондак 1
Возбрáнный Воевóдо и Гóсподи, áда победи́телю, я́ко избáвлься от вéчныя смéрти, похвáльная воспису́ю Ти, создáние и раб Твой; но я́ко имéяй милосéрдие неизречéнное, от вся́ких мя бед свободи́, зову́ща: Иису́се, Сы́не Бóжий, поми́луй мя.
Икос 1
Ангелов Твóрче и Гóсподи сил, отвéрзи ми недоумéнный ум и язы́к на похвалу́ пречи́стаго Твоегó и́мене, я́коже глухóму и гугни́вому дрéвле слух и язы́к отвéрзл еси́, и глагóлаше зовы́й таковáя: Иису́се пречу́дный, Ангелов удивлéние; Иису́се преси́льный, прароди́телей избавлéние. Иису́се преслáдкий, патриáрхов величáние; Иису́се преслáвный, вéрных укреплéние. Иису́се прелюби́мый, прорóков исполнéние; Иису́се преди́вный, му́чеников крéпосте. Иису́се прети́хий, монáхов рáдосте; Иису́се преми́лостивый, пресви́теров слáдосте. Иису́се премилосéрдый, пóстников воздержáние; Иису́се преслáдостный, преподóбных рáдование. Иису́се пречестны́й, дéвственных целому́дрие; Иису́се предвéчный, грéшников спасéние. Иису́се, Сы́не Бóжий, поми́луй мя.
Кондак 2
Ви́дя вдови́цу зéльне плáчущую, Гóсподи, я́коже тогдá умилосéрдився, сы́на ея́ на погребéние несóма воскреси́л еси́: си́це и о мне умилосéрдися, Человеколю́бче, и грехáми умерщвлéнную мою́ ду́шу воскреси́, зову́щую: Аллилу́иа.
Икос 2
Рáзум неуразумéнный разумéти Фили́пп ищá, Гóсподи, покажи́ нам Отцá, глагóлаше; Ты же к нему́: толи́кое врéмя сый со Мнóю, не познáл ли еси́, я́ко Отéц во Мне, и Аз во Отцé есмь? Тéмже, Неизслéдованне, со стрáхом зову́ Ти: Иису́се, Бóже предвéчныи́; Иису́се, Царю́ преси́льный. Иису́се, Влады́ко долготерпели́выи́; Иису́се, Спáсе преми́лостивый. Иису́се, храни́телю мой преблаги́й; Иису́се, очи́сти грехи́ моя́. Иису́се, отыми́ беззакóния моя́; Иису́се, отпусти́ непрáвды моя́. Иису́се, надéждо моя́, не остáви менé; Иису́се, помóщниче мой, не отри́ни менé. Иису́се, Создáтелю мой, не забу́ди менé; Иису́се, Пáстырю мой, не погуби́ менé. Иису́се, Сы́не Бóжий, поми́луй мя.
Кондак 3
Си́лою свы́ше апóстолы облеки́й, Иису́се, во Иерусали́ме седя́щия, облецы́ и менé, обнажéннаго от вся́каго благотворéния, теплотóю Ду́ха Святáго Твоегó, и даждь ми с любóвию пéти Тебé: Аллилу́иа.
Икос 3
Имéяй богáтство милосéрдия, мытари́ и грéшники, и невéрныя призвáл еси́, Иису́се; не прéзри и менé ны́не, подóбнаго им, но я́ко многоцéнное ми́ро, приими́ песнь сию: Иису́се, си́ло непобеди́мая; Иису́се, ми́лосте безконéчная. Иису́се, красотó пресвéтлая; Иису́се, любы́ неизречéнная. Иису́се, Сы́не Бóга живáго; Иису́се, поми́луй мя грéшнаго. Иису́се, услы́ши мя, в беззакóниих зачáтаго; Иису́се, очи́сти мя, во гресéх рождéннаго. Иису́се, научи́ мя непотрéбнаго; Иису́се, освети́ мя тéмнаго. Иису́се, очи́сти мя сквéрнаго; Иису́се, возведи́ мя блу́днаго. Иису́се, Сы́не Бóжий, поми́луй мя.
Кондак 4
Бу́рю внутрь имéяй помышлéний сумни́тельных, Петр утопáше; узрéв же во плóти Тя су́ща, Иису́се, и по водáм ходя́ща, познá Тя Бо́га и́стиннаго, и ру́ку спасéния получи́в, речé: Аллилу́иа.
Икос 4
Слы́ша слепы́й мимоходя́ща Тя, Гóсподи, путéм, вопия́ше: Иису́се, Сы́не Дави́дов, поми́луй мя! И, призвáв, отвéрзл еси́ óчи его. Просвети́ у́бо ми́лостию Твоéю óчи мы́сленныя сéрдца и менé, вопию́ща Ти и глагóлюща: Иису́се, вы́шних Создáтелю; Иису́се, ни́жних Искупи́телю. Иису́се, преиспóдних потреби́телю; Иису́се, всея́ твáри украси́телю. Иису́се, души́ моея́ утéшителю; Иису́се, умá моегó просвети́телю. Иису́се, сéрдца моегó весéлие; Иису́се, тéла моегó здрáвие. Иису́се, Спáсе мой, спаси́ мя; Иису́се, свéте мой, просвети́ мя. Иису́се, му́ки вся́кия избáви мя; Иису́се, спаси́ мя недостóйнаго. Иису́се, Сы́не Бóжий, поми́луй мя.
Кондак 5
Боготóчною Крóвию я́коже искупи́л еси́ нас дрéвле от закóнныя кля́твы, Иису́се, си́це изми́ нас от сéти, éюже змий запя́т ны страстьми́ плотски́ми, и блу́дным наваждéнием, и злым уны́нием, вопию́щия Ти: Аллилу́иа.
Икос 5
Ви́девше óтроцы еврéйстии во óбразе человéчестем Создáвшаго рукóю человéка, и Влады́ку разумéвше Его, потщáшася вéтвьми угоди́ти Ему́, осáнна вопию́ще. Мы же песнь принóсим Ти, глагóлюще: Иису́се, Бóже и́стинныи́; Иису́се, Сы́не Дави́дов. Иису́се, Царю́ преслáвный; Иису́се, Агнче непорóчный. Иису́се, Пáстырю преди́вный; Иису́се, храни́телю во млáдости моéй. Иису́се, корми́телю во ю́ности моéй; Иису́се, похвалó в стáрости моéй. Иису́се, надéждо в смéрти моéй; Иису́се, животé по смéрти моéй. Иису́се, утешéние моé на судé Твоéм; Иису́се, желáние моé, не посрами́ менé тогдá. Иису́се, Сы́не Бóжий, поми́луй мя.
Кондак 6
Проповéдник богонóсных вещáние и глагóлы исполня́я, Иису́се, на земли́ я́влься и с человéки Невмести́мый пожи́л еси́, и болéзни нáша подъя́л еси́, отоню́дуже ранами Твои́ми мы исцелéвше, пéти навыкóхом: Аллилу́иа.
Икос 6
Возсия́ вселéнней просвещéние и́стины Твоея́, и отгнáся лесть бесóвская: и́доли бо, Спáсе наш, не терпя́ще Твоея́ крéпости, падóша. Мы же, спасéние получи́вше, вопиéм Ти: Иису́се, и́стино, лесть отгоня́щая; Иису́се, свéте, превы́шший всех свéтлостей. Иису́се, Царю́, премогáяй всех крéпости; Иису́се, Бо́же, пребывáяй в ми́лости. Иису́се, Хлéбе живóтный, насы́ти мя áлчущаго; Иису́се, истóчниче рáзума, напои́ мя жáждущаго. Иису́се, одéждо весéлия, одéй мя тлéннаго; Иису́се, покрóве рáдости, покры́й мя недостóйнаго. Иису́се, подáтелю прося́щим, даждь ми плач за грехи́ моя́; Иису́се, обрéтение и́щущим, обря́щи ду́шу мою́. Иису́се, отвéрзителю толку́щим, отвéрзи сéрдце моé окая́нное; Иису́се, Искупи́телю грéшных, очи́сти беззакóния моя́. Иису́се, Сы́не Бóжий, поми́луй мя.
Кондак 7
Хотя́ сокровéнную тáйну от вéка откры́ти, я́ко овчá на заколéние ведéн был еси́, Иису́се, и я́ко áгнец пря́мо стригу́щаго его безглáсен, и я́ко Бог из мéртвых воскрéсл еси́, и со слáвою на небесá вознéслся еси́, и нас совоздви́гл еси́, зову́щих: Аллилу́иа.
Икос 7
Ди́вную показá тварь, явлéйся Творéц нам: без сéмене от Дéвы воплоти́ся, из грóба, печáти не руши́в, воскрéсе, и ко апóстолом, двéрем затворéнным, с плóтию вни́де. Тéмже чудя́щеся, воспои́м: Иису́се, Слóве необымéнный; Иису́се, Слóве несоглядáемый. Иису́се, си́ло непостижи́мая; Иису́се, му́дросте недомы́слимая. Иису́се, Божествó неопи́санное; Иису́се, госпóдство неисчéтное. Иису́се, цáрство непобеди́мое; Иису́се, влады́чество безконéчное. Иису́се, крéпосте высочáйшая; Иису́се, влáсте вéчная. Иису́се, Твóрче мой, ущéдри мя; Иису́се, Спáсе мой, спаси́ мя. Иису́се, Сы́не Бóжий, поми́луй мя.
Кондак 8
Стрáнно Бóга вочеловéчшася ви́дяще, устрани́мся су́етнаго ми́ра и ум на Божéственная возлóжим. Сегó бо рáди Бог на зéмлю сни́де, да нас на небесá возведéт, вопию́щих Ему: Аллилу́иа.
Икос 8
Весь бе в ни́жних, и вы́шних никáкоже отступи́ Неисчéтный, егдá вóлею нас рáди пострадá, и смéртию Своéю нáшу смерть умертви́, и воскресéнием живóт даровá пою́щим: Иису́се, слáдосте сердéчная; Иису́се, крéпосте телéсная. Иису́се, свéтлосте душéвная; Иису́се, быстротó у́мная. Иису́се, рáдосте сóвестная; Иису́се, надéждо извéстная. Иису́се, пáмяте предвéчная; Иису́се, похвалó высóкая. Иису́се, слáво моя́ превознесéнная; Иису́се, желáние моé, не отри́ни менé. Иису́се, Пáстырю мой, взыщи́ менé; Иису́се, Спáсе мой, спаси́ менé. Иису́се, Сы́не Бóжий, поми́луй мя.
Кондак 9
Все естествó áнгельское безпрестáни слáвит пресвятóе и́мя Твоé, Иису́се, на небеси́, Свят, Свят, Свят вопию́ще; мы же грéшнии на земли́ брéнными устнáми вопиéм: Аллилу́иа.
Икос 9
Вети́я многовещáнныя я́коже ры́бы безглáснии ви́дим о Тебé, Иису́се, Спáсе наш: недоумéют бо глагóлати, кáко Бог непрелóжный и человéк совершéнный пребывáеши? Мы же тáинству дивя́щеся, вопиéм вéрно: Иису́се, Бóже предвéчный; Иису́се, Царю́ цáрствующих. Иису́се, Влады́ко владéющих; Иису́се, Судиé живы́х и мéртвых. Иису́се, надéждо ненадéжных; Иису́се, утешéние плáчущих. Иису́се, слáво ни́щих; Иису́се, не осуди́ мя по дело́м мои́м. Иису́се, очи́сти мя по ми́лости Твоéй; Иису́се, отжени́ от менé уны́ние. Иису́се, просвети́ моя́ мы́сли сердéчныя; Иису́се, даждь ми пáмять смéртную. Иису́се, Сы́не Бóжий, поми́луй мя.
Кондак 10
Спасти́ хотя́ мир, Востóче востóком, к тéмному зáпаду — естеству́ нáшему пришéд, смири́лся еси́ до смéрти; тéмже превознесéся и́мя Твоé пáче вся́каго и́мене, и от всех колéн небéсных и земны́х слы́шиши: Аллилу́иа.
Икос 10
Царю́ Превéчный, Утéшителю, Христé и́стинный, очи́сти ны от вся́кия сквéрны, я́коже очи́стил еси́ дéсять прокажéнных, и исцели́ ны, я́коже исцели́л еси́ сребролюби́вую ду́шу Закхéа мытаря́, да вопиéм Ти, во умилéнии зову́ще: Иису́се, сокрóвище нетлéнное; Иису́се, богáтство неистощи́мое. Иису́се, пи́ще крéпкая; Иису́се, питиé неисчерпáемое. Иису́се, ни́щих одея́ние; Иису́се, вдов заступлéние. Иису́се, си́рых защи́тниче; Иису́се, труждáющихся пóмоще. Иису́се, стрáнных настáвниче; Иису́се, плáвающих кóрмчий. Иису́се, бу́рных оти́шие; Иису́се Бóже, воздви́гни мя пáдшаго. Иису́се, Сы́не Бóжий, поми́луй мя.
Кондак 11
Пéние всеумилéнное приношу́ Ти недостóйный, вопию́ Ти я́ко хананéа: Иису́се, поми́луй мя; не дщерь бо, но плоть и́мам, страстьми́ лю́те беся́щуюся и я́ростию пали́мую, и исцелéние даждь вопию́щу Ти: Аллилу́иа.
Икос 11
Светоподáтельна свети́льника су́щим во тьме неразу́мия, прéжде гоня́й Тя Пáвел, богоразу́мнаго глáса си́лу внуши́ и душéвную быстроту́ уясни́; си́це и менé тéмныя зени́цы душéвныя просвети́, зову́ща: Иису́се, Царю́ мой прекрéпкий; Иису́се, Бóже мой преси́льный. Иису́се, Гóсподи мой пребезсмéртный; Иису́се, Создáтелю мой преслáвный. Иису́се, Настáвниче мой предóбрый; Иису́се, Пáстырю мой прещéдрый. Иису́се, Влады́ко мой преми́лостивыи́; Иису́се, Спáсе мой премилосéрдый. Иису́се, просвети́ моя́ чу́вствия, потемнéнная страстьми́; Иису́се, исцели́ моé тело, оструплéнное грехми́. Иису́се, очи́сти мой ум от пóмыслов су́етных; Иису́се, сохрани́ сéрдце моé от пóхотей лукáвых. Иису́се, Сы́не Бóжий, поми́луй мя.
Кондак 12
Благодáть подáждь ми, всех долгóв реши́телю, Иису́се, и приими́ мя кáющася, я́коже прия́л еси́ Петрá, отвéргшагося Тебé, и призови́ мя унывáющаго, я́коже дрéвле Пáвла, гоня́ща Тя, и услы́ши мя, вопию́ща Ти: Аллилу́иа.
Икос 12
Пою́ще Твоé вочеловéчение, восхваля́ем Тя вси, и вéруем со Фомóю, я́ко Госпóдь и Бог еси́, седя́й со Отцéм и хотя́й суди́ти живы́м и мéртвым. Тогдá у́бо сподóби мя деснáго стоя́ния, вопию́щаго: Иису́се, Царю́ предвéчный, поми́луй мя; Иису́се, цвéте благовóнный, облагоухáй мя. Иису́се, теплотó люби́мая, огрéй мя; Иису́се, хрáме предвéчный, покры́й мя. Иису́се, одéждо свéтлая, украси́ мя; Иису́се, би́сере честны́й, осия́й мя. Иису́се, кáменю драги́й, просвети́ мя; Иису́се, Сóлнце прáвды, освети́ мя. Иису́се, свéте святы́й, облистáй мя; Иису́се, болéзни душéвныя и телéсныя избáви мя. Иису́се, из руки́ сопроти́вныя изми́ мя; Иису́се, огня́ негаси́маго и прóчих вéчных мук свободи́ мя. Иису́се, Сы́не Бóжий, поми́луй мя.
Кондак 13
О, преслáдкий и всещéдрый Иису́се! Приими́ ны́не мáлое молéние сиé нáше, я́коже прия́л еси́ вдови́цы две лéпте, и сохрани́ достоя́ние Твоé от враг ви́димых и неви́димых, от нашéствия иноплемéнник, от неду́га и глáда, от вся́кия скóрби и смертонóсныя рáны, и гряду́щия изми́ му́ки всех, вопию́щих Ти: Аллилу́иа.
Этот кондак читается трижды, затем 1-й икос: Ангелов Твóрче... и 1-й кондак: Возбрáнный Воевóдо...
Икос 1
Ангелов Твóрче и Гóсподи сил, отвéрзи ми недоумéнный ум и язы́к на похвалу́ пречи́стаго Твоегó и́мене, я́коже глухóму и гугни́вому дрéвле слух и язы́к отвéрзл еси́, и глагóлаше зовы́й таковáя: Иису́се пречу́дный, Ангелов удивлéние; Иису́се преси́льный, прароди́телей избавлéние. Иису́се преслáдкий, патриáрхов величáние; Иису́се преслáвный, вéрных укреплéние. Иису́се прелюби́мый, прорóков исполнéние; Иису́се преди́вный, му́чеников крéпосте. Иису́се прети́хий, монáхов рáдосте; Иису́се преми́лостивый, пресви́теров слáдосте. Иису́се премилосéрдый, пóстников воздержáние; Иису́се преслáдостный, преподóбных рáдование. Иису́се пречестны́й, дéвственных целому́дрие; Иису́се предвéчный, грéшников спасéние. Иису́се, Сы́не Бóжий, поми́луй мя.
Кондак 1
Возбрáнный Воевóдо и Гóсподи, áда победи́телю, я́ко избáвлься от вéчныя смéрти, похвáльная воспису́ю Ти, создáние и раб Твой; но я́ко имéяй милосéрдие неизречéнное, от вся́ких мя бед свободи́, зову́ща: Иису́се, Сы́не Бóжий, поми́луй мя.
Молитва
Влады́ко Гóсподи Иису́се Христé Бóже мой, Иже неизречéннаго рáди Твоегó человеколю́бия на конéц векóв во плоть оболки́йся от Приснодéвы Мари́и, слáвлю о мне Твоé спаси́тельное промышлéние, раб Твой, Влады́ко; песнослóвлю Тя, я́ко Тебé рáди Отцá познáх; благословлю́ Тя, Его́же рáди и Дух Святы́й в мир прии́де; покланя́юся Твоéй по плóти Пречи́стей Мáтери, таковéй стрáшней тáйне послужи́вшей; восхваля́ю Твоя́ áнгельская ликостоя́ния, я́ко воспевáтели и служи́тели Твоегó вели́чествия; ублажáю Предтéчу Иоáнна, Тебé крести́вшаго, Гóсподи; почитáю и провозвести́вшия Тя прорóки, прославля́ю апóстолы Твоя́ святы́я; торжеству́ю же и му́ченики, свящéнники же Твоя́ слáвлю; покланя́юся преподóбным Твои́м, и вся Твоя́ прáведники пéстунствую. Таковáго и толи́каго мнóгаго и неизречéннаго ли́ка Божéственнаго в моли́тву привожду́ Тебé, всещéдрому Бóгу, раб Твой, и сегó рáди прошу́ мои́м согрешéнием прощéния, éже дáруй ми всех Твои́х рáди святы́х, изря́днее же святы́х Твои́х щедрóт, я́ко Благословéн еси́ во вéки, ами́нь.